12.08.2026 | 00:10
«Արարատ-Արմենիան» դուրս մնաց Չեմպիոնների լիգայից. ՏԵՍԱՆՅՈՒԹ
Թանկացումներ կաթնամթերքի շուկայում. «Փաստ»
02.02.2018 | 09:00
«Փաստ» օրաթերթը գրում է.
Գնաճը չի շրջանցել նաև կաթնամթերքի շուկան: Թանկացել է պանիրը: Աշոցքի պանրի գործարանի արտադրանքի գինը տարեսկզբից 10%–ով բարձրացել է: Ընկերության տնօրեն Գեորգի Բաղդասարյանը թանկացման պատճառներն է թվում:
«Մոտ 40%–ով կաթի մթերման գինն է ավելացել, ինչն արտադրանքի վրա ազդել է: Այսօր կաթը քիչ է արտադրվում՝ կովերի 10–12%–ն է կաթ տալիս: Կաթի թանկացումը բերել է պանրի գների աճին»,– «Փաստ»–ի հետ զրույցում պարզաբանեց տնօրենը:
Գործարանը կաթի լիտրը գյուղացուց 180–190 դրամով է գնում: Նախորդ տարի այս ժամանակաշրջանում ավելի էժան էին գնում: Թանկացման պատճառը ոչ միայն արտադրության ծավալների պակասն է:
«Անասնակերը՝ խոտը, գյուղացին թանկ է գնել, որի հետևանքով իր արտադրանքը բարձր գնով է վաճառում: Եթե այսպես շարունակվի, գնաճ կլինի: Իմ ենթադրություններով պանիրը կրկին կթանկանա, եթե կաթի արտադրության ծավալների և մթերման գնի փոփոխություն չլինի»,– նկատեց արտադրողը:
Անդրադառնալով կարագի գներին` նա ասաց, որ տեղական արտադրության կարագի ծավալները քիչ են, դրսից ներկրվածն էլ բարձր գներով է սպառվում:
Արագածոտնի մարզում կաթի մթերման գինը 190–200 դրամի սահմաններում է տատանվում: Գնորդներից մեկը Ապարանի պանրի գործարանն է: Գներից ելնելով` առայժմ պանիր չեն արտադրում, իսկ կաթնամթերքը չեն թանկացրել: Տնօրեն Տիգրան Հովհաննիսյանի խոսքով, սակայն, գների բարձրացումն անխուսափելի է:
«Դեռ ծինը չի սկսվել, սեզոնայնությամբ պայմանավորված` կաթի գինը բարձր է: Այս պայմաններում աշխատելը մեզ շահույթ չի բերում: Եթե կաթի գինը բարձր մնա, անպայման կաթնամթերքը թանկանալու է: Առայժմ ես իմ արտադրանքը չեմ թանկացրել, բայց ուրիշ «վարյանտ» չունենք: Չեմ կարծում, որ առաջիկայում գները այսպես մնան: Հունվարի վերջն է, բայց դեռ ծինը չի սկսվել, այս տարվա նման դեռ չի եղել»,– մանրամասնեց մեր զրուցակիցը:
Նրա դիտարկմամբ՝ կաթնամթերքի շուկայում գնաճից խուսափելու համար կառավարությունը պետք է քայլեր ձեռնարկի՝ խրախուսելով անասնապահության զարգացում:
«Կաթի արտադրության ծավալները պետք է շատ լինեն, որ էժան լինի»,– նշեց նա:
Առավել մանրամասն՝ թերթի այսօրվա համարում:
