«Նիկոլ Փաշինյանը մահվան գնով պահելու է իր աթոռը. պետք է արտահերթ ընտրություն անել»․ Էդմոն Մարուքյան. ՏԵՍԱՆՅՈՒԹ

Factor TV-ի հարցազրույցը ՀՀ ԱԺ «Լուսավոր Հայաստան» խմբակցության ղեկավար Էդմոն Մարուքյանի հետ

-Պարո՛ն Մարուքյան, Հանրապետության հրապարակում հրավիրված հանրահավաքին Նիկոլ Փաշինյանը հայտարարություն արեց՝ նշելով, որ ժողովրդին հայտնի քաղաքական ուժերը փորձում են Զինված ուժերին դրդել տանկերը հանել սեփական ժողովրդի դեմ։ Դուք նման միտում տեսնո՞ւմ եք։

-Եղել են կոչեր, որ բանակը չպետք է ենթարկվի և այլն, բայց մեր բանակն այդպիսին չէ, և բանակը որևէ նման քայլի չի գնացել։ Նիկոլ Փաշինյանն ուզում է դա օգտագործել՝ բանակի հետ իր խնդիրները լուծելու գործում։ Նախ ինչ է պետք անել. բանակը զրկել ժողովրդական աջակցությունից, ասել, որ նրանք Սերժի հրամանն են կատարում, Քոչարյանի հրամանն են կատարում, եսիմ ինչ են անում, վատն են, դավաճան են, հեռացնել նրանց, հետո քրեական գործեր հարուցել, ինչի մասին խոսել եմ։ Բայց սա պրիմիտիվ ձև է, որովհետև մարդիկ չեն հավատում, որ ԶՈւ-ն նման քայլի գնացել է կամ կգնա։ ԶՈւ-ն նման քայլ անելու հնարավորություն բազմիցս ունեցել է, բայց չի արել, նաև՝ այն օրը, երբ ԱԺ շենքը, Կառավարության շենքը գրավված էին, վարչապետը «բունկերում» էր։ Այդ ժամանակ Զինված ուժերը կարող էր դա անել, բայց չի արել, չէ՞։

-Դուք և Ձեր թիմակիցները պնդումներ էիք անում, որ երկրում կան զինված խմբեր, իշխանությունը կարող է վարչական ռեսուրս կիրառել և այդ պայմաններում չեք ցանկանա մասնակցել ընտրությունների։ Հիմա ասում եք՝ պատրաստ եք մասնակցել ընտրություններին, օր առաջ արտահերթ ընտրություն պետք է անցկացվի։ Ի՞նչ փոխվեց և արդյո՞ք այդ վտանգն այլևս չեք տեսնում, որ կարող է լուրջ վարչական ռեսուրս օգտագործվել։

-Մենք որ ասել ենք՝ հիմա ընտրություններ անելն անհնար է, դա հղի է բախումներով, դա եղել է նոյեմբերի 15-ը, 20-ը, 30-ը, դեկտեմբերի առաջին կեսը։ Մենք հիմա մարտ ամսվա մեջ ենք, մարտի 2-ն է այսօր։ Այս ժամանակահատվածում մի քանի կարևոր հանգամանքներ են պարզվել. առաջինն այն է, որ Փաշինյանը ոչ մի պարագայում հրաժարական չի տալու, որ լինի անցումային վարչապետ, դա բացառված բան է, հետևաբար՝ միակ ճանապարհը, որ այս քաոսն ավարտվի և լինի արտահերթ ընտրություն՝ եթե չէ, 3 տարուց են ընտրությունները։ Ուզո՞ւմ եք 3 տարուց լինի ընտրություն։ Եթե ուզում եք՝ երկիրը հանդարտվի, այս գիծը քաշենք. մեղավորները մի կողմ, անմեղները՝ մի կողմ, պետք է անել ընտրություններ։ Մենք այն ժամանակ հույս ունեինք, որ կփոխվի իրավիճակը. իր թիմից կընտրի մեկին, ուրիշ տեղից կբերի։ Բայց ձև չկա. Փաշինյանն ասաց, որ աթոռն ամեն ինչից թանկ է, մահվան գնով պահելու է։ Հետևաբար, պետք է գնալ ընտրությունների։

-Այսինքն, հիմա խնդիրը լինելու վերահսկողությունն ուժեղացնե՞լը, որպեսզի վարչական լծակներ չկիրառվեն։

-Բա ոնց։ Հիմա «Լուսավոր Հայաստան»-ը տեղամասերում ունի չորս հազար հանձնաժողովի անդամ, նույնքան ունի «Բարգավաճ Հայաստան»-ը։ Եղավ ութ հազար մարդ։ Դրան գումարած՝ մենք կարող ենք ներգրավել վստահված անձանց՝ ամեն տեղամասում մի հոգու, ևս երկու հազար մարդ։ Այսինքն՝ վեց հազար մարդու միայն մենք կարող ենք ներգրավել՝ հսկելու համար։

Հարցազրույցն ամբողջությամբ՝ տեսանյութում։

Մերի Մարտիրոսյան