Փաշինյանը «Իսկանդերի» մասին խոսել է Պուտինի հետ, Օնիկ Գասպարյանը չի մասնակցել ԱԽ նիստին․ Լուրեր

Վարչապետ Նիկոլ Փաշինյանի գլխավորությամբ տեղի է ունեցել Անվտանգության խորհրդի նիստ: Հայտնում են վարչապետի աշխատակազմից։ Քննարկվել են արտաքին և ներքին անվտանգային օրակարգին, մարտահրավերներին ու դրանց հաղթահարման ուղիներին վերաբերող հարցեր:

Factor TV-ի հետ զրույցում վարչապետի մամուլի քարտուղար Մանե Գևորգյանը տեղեկացրել է, որ նիստի մասին տեղեկացված է եղել նաև ՀՀ ԶՈՒ ԳՇ պետ Օնիկ Գասպարյանը, սակայն չի մասնակցել նիստին։

Նիստից հետո տարածած հայտարարությամբ Անվտանգության խորհուրդը նախագահին կոչ է արել բավարարել ՀՀ վարչապետի` Գլխավոր շտաբի պետին պաշտոնից ազատելու միջնորդությունը եւ ստորագրել համապատասխան հրամանագիր:

—

Նախագահ Արմեն Սարգսյանը մինչ այդ հայտարարություն է տարածել, որում նշում է, որ անթույլատրելիորեն շահարկվում է և ոչ համարժեք արձագանքի է արժանացել այն, որ ինքը վարչապետին է վերադարձրել Օնիկ Գասպարյանին ազատելու առաջարկը։

Հայտարարությունում նշվում է, որ նախագահը չի ներկայացնում որևէ քաղաքական ուժի շահերը, սև կամ սպիտակ չէ, և այդ առումով անթույլատրելի և անընդունելի է ցանկացած շահարկում: Սարգսյանը նշել է, որ սահմանված ժամկետում կարտահայտի իր դիրքորոշումը հարցի շուրջ։

—

ՀՀ վարչապետը և Ռուսաստանի նախագահը վերջերս կայացած հեռախոսազրույցի ընթացքում քննարկել են նաև Հայաստանի կողմից «Իսկանդեր» համակարգի կիրառման վերաբերյալ ՀՀ վարչապետի հայտարարությունը: Հայտնել է վարչապետի խոսնակ Մանե Գևորգյանը: Ըստ խոսնակի՝ վարչապետն առկա փաստերի և տվյալների համադրության արդյունքում եկել է եզրակացության, որ իրեն այս իրավիճակի առնչությամբ ճիշտ չի զեկուցվել:

—

Արցախի խորհրդարանը այսօր ընդունել է հայտարարություն, որում ասվում է, որ մինչ այս պահը Ադրբեջանի վերահսկողության տակ հայտնված Արցախի տարածքները համարվում են բռնազավթված (օկուպացված) Ադրբեջանի կողմից, իսկ Արցախի նկատմամբ Ադրբեջանի իրականացրած ագրեսիան և նշված տարածքների բռնազավթումը որևէ իրավական ազդեցություն չեն կարող ունենալ ապագա բանակցությունների ընթացքում Արցախի կարգավիճակի ու սահմանների որոշման գործընթացում։