Հիվանդանոցների, մասնավոր բանկերի ու երկաթգծի աշխատակիցները գործադուլ են հայտարարել Մյանմարում

Մյանմարի շուրջ 1260 հիվանդանոցներից և առողջապահական այլ հաստատություններից գրեթե 360-ի աշխատակիցները գործադուլ են անում ընդդեմ երկրում տեղի ունեցած ռազմական հեղաշրջման: Յանգոն խոշորագույն քաղաքում դադարեցվել է բոլոր երկաթուղիների երթևեկությունը։ Անհնազանդության արշավին մասնակցում են նաև նախարարությունների և կառավարական գերատեսչությունների շուրջ 3000 աշխատակից։ Այս մասին հայտնում է «ՏԱՍՍ»-ը՝ հղում կատարելով ճապոնական Yomiuri թերթին:

Տեղեկացվում է, որ մասնավոր բանկերի աշխատակիցների գործադուլը առանձնակի ուժեղ հարված է հասցնում Մյանմարի տնտեսությանը: Արդյունքում, գրեթե անհնար է գումար կանխիկացնել երկրի բանկոմատներից: Դա հանգեցնում է աշխատավարձերի վճարման համատարած ձգձգումների:

Փետրվարի 1-ին Մյանմարի զինված ուժերի հրամանատարությունը երկրում մեկ տարի ժամկետով արտակարգ դրություն է հայտարարել և հեռացրել երկրի քաղաքացիական ղեկավարությանը: Զինվորականները նրանց մեղադրել են նոյեմբերին կայացած խորհրդարանական ընտրություններում լայնամասշտաբ կեղծիքների մեջ: Ձերբակալվել են քաղաքացիական վարչակազմի բարձրաստիճան պաշտոնյաներ, այդ թվում ` նախագահ Վին Մինը և Պետական խորհրդական, Արտաքին գործերի նախարար և Խաղաղության Նոբելյան մրցանակի դափնեկիր Աունգ Սան Սու Կինը, որի կուսակցությունը հաղթել է ընտրություններում և պետք է սկսեր կառավարության ձևավորումը: Հեղաշրջումից հետո երկրում ստեղծվել է նոր կառավարություն, որտեղ ամենակարևոր պաշտոններն ստանձնել են ռազմական օղակների մարդիկ:

Փետրվարի 6-ից Մյանմարում գրեթե ամեն օր տեղի են ունենում բազմահազարանոց բողոքի ցույցեր ընդդեմ ռազմական իշխանությունների: Ըստ ՄԱԿ-ի Մարդու իրավունքների գերագույն հանձնակատարի գրասենյակի՝ կիրակի օրը բողոքի ցույցերի ճնշման ընթացքում սպանվել է առնվազն 18 մարդ, 30-ը՝ վիրավորվել: Հարյուրավոր ցուցարարներ բերման են ենթարկվել:

Տաթև Ֆռանգյան