15.11.2024 | 12:34
Զելենսկին հայտարարել է, որ հաջորդ շաբաթ կներկայացվի երկրի «Դիմադրողականության պլանը»
22 տարի առաջ Արմեն Սարգսյանը ցանկանում էր վերացնել գերատեսչությունների լրատվական բաժինները
Քաղաքականություն
30.01.2018 | 22:29
Հանրապետական կուսակցության նախագահի թեկնածու Արմեն Սարգսյանը սկսել է իր հանդիպումները Հայաստանի քաղաքական և գիտական էլիտայի հետ: Երեկ նա ՀՀԿ խմբակցության պատգամավորներին է հանդիպել, ՀՅԴ ղեկավար կազմին, այսօր՝ «ակադեմիական» գիտնականների: Դրանք առայժմ հարթ և առանց էքսցեսների են անցնում: Մինչդեռ լրագրողների հետ Արմեն Սարգսյանի հարաբերությունները կարծես թե չեն ստացվում: Անգամ ամենաանմեղ հարցը, ինչպես, օրինակ, «Դուք գո՞հ եք հանրապետական կուսակցության հետ ձեր հանդիպումից», լարում է Սերժ Սարգսյանի «ընտրյալին», և նա մերժում է լրագրողներին՝ ասելով. «Խնդրում եմ, ձեր բոլոր հարցերը ուղղեք իմ գրասենյակ», կամ «Երբ որ ժամանակը լինի, ձեր բոլոր հարցերին կպատասխանեմ»:
ՀՀԿ թեկնածուն ափսոսում է իր թանկարժեք ժամանակը, մի 5-10 րոպե էլ չի ուզում հատկացնել լրագրողներին, որ նրանք չխանգարեն իրեն «էֆեկտիվ ձևով» մտքեր կառուցել: «Թույլ տվեք ինձ, որ օգտագործեմ իմ ժամանակը, որպեսզի հանդիպումներին էֆեկտիվ ձևով կարողանամ կազմավորեմ ծրագիրը իմ մտքում»,- անգլիական ժպիտով արտաբերել է Արմեն Սարգսյանը հունվարի 29-ին ՀՀԿ-ական պատգամավորների հետ հանդիպումից հետո, իսկ այսօր ԳԱԱ-ում լրագրողներին տարատեսակ խորհուրդներ էր տալիս՝ հանգստանալ, կարդալ Սահմանադրությունը, կարդալ Dayli Mail` անգլերեն:
Մինչդեռ ամեն ինչ այնքան լավ էր սկսվում: 1996 թվականի դեկտեմբերին, երբ Արմեն Սարգսյանը դարձավ Հայաստանի վարչապետ, նրա առաջին նախաձեռնություններից մեկը վերաբերում էր հենց լրագրողներին: Արմեն Սարգսյանն այն ժամանակ պատրաստվում էր հեշտացնել ԶԼՄ-ների աշխատանքը և վերացնել պետական մարմինների լրատվական ծառայությունները, մամուլի պատասխանատուների պաշտոնները, քանի որ գտնում էր, որ դրանք ավելորդ օղակներ են, որոնք բյուջեից միջոցներ են խլում և խանգարում են ԶԼՄ-ների ներկայացուցիչների ու պետական պաշտոնյաների ուղիղ շփումներին: Արմեն Սարգսյանն այն ժամանակ բաց էր մամուլի առաջ, լրագրողները նրան չէին լարում: Նա ընդամենը երկու ամիս Հայաստանի վարչապետ աշխատեց, բայց այս կարճ ժամանակում առանց սպասելու, որ լրանա իր պաշտոնավարման 100 օրը, մամուլի ասուլիս հրավիրեց, որին ներկա էին բոլոր ցանկացողները: Առաջին և միակ ասուլիսի ժամանակ Հայաստանի վարչապետ Արմեն Սարգսյանը հայտարարեց մամուլի բաժինները վերացնելու իր մտադրության մասին: Այս հայտարարությունից հետո լրագրողները ցնծության մեջ էին, իսկ «գերատեսչական» մամուլում սուգ էր: Ոմանք նույնիսկ սկսեցին նոր աշխատանք փնտրել:
Այսպես էր սկսում հասարակության հետ հարաբերվել նա, ով այսօր խորհուրդ է տալիս լրագրողներին հարցերն ուղարկել իր գրասենյակ: Ի՞նչն է փոխվել: Գուցե տարիքի հետ մարդիկ ավելի զգուշավո՞ր են դառնում:
Սյուզան Սիմոնյան
