11.09.2026 | 15:51
Սամվել Կարապետյանի գործով դատական նիստը. ՈՒՂԻՂ
Հենակների փոխարեն՝ ստեղներ. վիրավոր զինվորները նվագել են սովորում. ՏԵՍԱՆՅՈՒԹ
21.02.2021 | 16:30
Ռազմական գործողություններից մինչև դաշնամուրի դասեր։ Սպա Հենրիկ Շաքարյանի՝ վերջին ամիսների անցած ճանապարհն է։ Թե ինչպես զենքին փոխարինեցին հենակները, պատմել չի ուզում․ կարևորը հենակներին արդեն ժամանակ առ ժամանակ ստեղներն են փոխարինում։ Չնայած նոտա չգիտի, բայց 2 օրում է երաժշտությունը սովորել․ արդեն ունկնդիր էլ ունի։
Պատերազմի 6-րդ օրն է վիրավորվել, 2 ոտքից։ Դեռ տուն չի գնացել։ Ասում է՝ տանեցիների համար էլ է իր նվագելն անակնկալ լինելու։
Հենրիկը Լիլիթ Ազարյանի 6 աշակերտներից մեկն է։ Մասնագիտությամբ տնտեսագետ Լիլիթի համար դաշնամուրը լիցքաթափվելու միջոց է եղել միշտ, իսկ արդեն 1 ամիս է՝ նաև մոտիվացման միջոց է։ Ամեն օր աշխատանքից հետո գալիս ու այս պատերի ներսում տղաների հետ միասին հետպատերազմյան ծանրությունը թեթևացնում են երաժշտությամբ։
Տղաները նոտա չգիտեն, յուրաքանչյուրը սովորելու իր տարբերակն ունի՝ Լիլիթը բոլորի համար տարբերակներ գտնում է։
Լիոն Չոփիկյանը ժամկետային զինծառայող է, Մարտունի 2-ում է ծառայել, հետո նաև՝ կռվել՝ 40 օր։
Պատերազմի 40-րդ օրն է վիրավորվել՝ ձեռքը, ոտքն ու ականջներն են վնասվել ։ Հիմա Հայրենիքի պաշտպանի վերականգնողական կենտրոն գալիս է՝ ընկերներին տեսնելու և դաշնամուրի դասերին մասնակցելու․ Մանսուրյանի ստեղծագործությունները Լիոնին են սպասում։
Երջանիկ Ստեփանյանի դեպքում հաճելին օգտակարի հետ է համատեղվում՝ նվագելով նաև ձեռքն է մարզում։ Ամիսներ առաջ մատները շարժելն անգամ երազանք էր Երջանիկի համար։
Մանրամասները՝ տեսանյութում։
Իրինա Մկրտչյան
