02.05.2024 | 17:40
Մակրոնը խոսել է այն մասին, թե երբ Արևմուտքը կարող է զորք ուղարկել Ուկրաինա
Եվրահանձնաժողովը Նուբար Աֆեյանի Moderna ընկերության հետ պատվաստանյութի մատակարարման 2-րդ պայմանագիրն է կնքել
Քաղաքականություն
17.02.2021 | 18:23
Եվրահանձնաժողովը հաստատել է ամերիկահայ բարերար, գործարար Նուբար Աֆեյանի Moderna ընկերության հետ պայմանագիրը՝ հավելյալ 300 միլիոն չափաբաժին կորոնավիրուսի պատվաստանյութ մատակարարելու վերաբերյալ։ Այս մասին Բրյուսելում կայացած մամլո ասուլիսի ժամանակ հայտարարել է Եվրահանձնաժողովի ղեկավար Ուրսուլա վոն դեր Լեյենը։ Այս մասին ասվում է Եվրահանձնաժողովի պաշտոնական կայքէջում։
Ինչպես ասվում է հայտարարության մեջ, 150 միլիոն չափաբաժին պատվաստանյութը պետք է մատակարարվի 2021 թվականին, մնացած 150 միլիոնը՝ անհրաժեշտության դեպքում 2022 թվականին։ «Նոր պայմանագիրը նաև նախատեսում է պատվաստանյութերի նվիրաբերումը ցածր կամ միջին եկամուտ ունեցող երկրներ»,- նշվում է պայմանագրում։
Ուրսուլա վոն դեր Լեյենը նշել է, որ Եվրամիությունում 22 միլիոն մարդ արդեն իսկ պատվաստվել է կորոնավիրուսի դեմ պատվաստանյութի առաջին չափաբաժնով, ինչը կազմում է բնակչության մոտ 5 տոկոսը: «Մինչ օրս Եվրամիությունը ստացել է պատվաստանյութերի 33 միլիոն չափաբաժին: 22 միլիոն մարդ՝ բնակչության մոտ 5 տոկոսը, արդեն պատվաստվել է առաջին չափաբաժնով, իսկ 7 միլիոն մարդ՝ երկու չափաբաժնով», – նշել է նա:
Տաթև Ֆռանգյան
