Ընդդիմության հանրահավաքներին ամենավերջին խուժանի բառապաշարով ելույթներ են հնչում. Հրաչյա Հակոբյան. ՏԵՍԱՆՅՈՒԹ

Մենք պատրաստ էինք հաշվի առնել ընդդիմության կարծիքը և առաջարկում էինք գնալ արտահերթ ընտրությունների, նրանք մերժեցին և դրանով, փաստացի, համակերպվեցին այն մտքի հետ, որ իրենք պարտվել են դեռ չկայացած ընտրություններում։ Այս մասին ԱԺ-ում լրագրողների հետ զրույցում ասաց ԱԺ «Իմ քայլը» խմբակցության պատգամավոր Հրաչյա Հակոբյանը:

Անդրադառնալով քննադատություններին, թե իշխանությունը վախեցավ Ռոբերտ Քոչարյանի՝ ակտիվ քաղաքականություն վերադառնալու մասին հայտարարություններից, Հակոբյանը նշեց, որ արտահերթ ընտրություններից հրաժարվելու որոշումը կայացվել է մի քանի ամիսների ընթացքում, իսկ Ռոբերտ Քոչարյանն իր հայատարարությունն արել է մոտ մեկ շաբաթ առաջ. «Հետևաբար իրականության հետ աղերս չունեն պնդումները, թե այս որոշումը Քոչարյանի հայտարարությամբ է պայմանավորված»։

Հարցին՝ ինչո՞վ էր պարտադիր հուշագրի ստորագրումը արտահերթ տնտրությունների գնալուց առաջ, Հակոբյանը նշեց, որ դա հանրությանն ի ցույց դնելու համար է, որ բոլոր խորհրդանական ուժերի կողմից կա քաղաքական կամք՝ գնալ արտահերթ ընտրությունների։

Պատգամավորի դիտարկմամբ՝ քաղաքական ճգնաժամն ընդդիմության դաշտում է, նրանք չեն կարողանում քաղաքացու հետ երկխոսել․ «Ընդդիմության հանրահավաքներին ամենավերջին խուժանի բառապաշարով ելույթներ են հնչում հարթակից: Այ՝ այդտեղ է ճգնաժամը: Դրա համար է, որ նրանք չեն ցանկանում մասնակցել ընտրությունների։ Մի քաղաքական գործիչ, որը ՀՀ քաղաքացիներին անվանում է բոմժ, հետո ի՞նչ երեսով կգնա քարոզարշավի և կմասնակցի ընտրությունների։ Պարզ է, չէ՞, որ նա ցանկանում է առանց հանրության կարծիքը հաշվի առնելու լինել խամաճիկային վարչապետ»։

Մանրամասները՝ տեսանյութում: