«Հունվարի վերջին կսկսվի գլոբալ «քիմմաքրումը», որի ալիքը Հայաստան կհասնի ապրիլի մոտակայքում». քաղաքագետ

Քաղաքագետ Անուշ Սեդրակյանը Factor.am-ի հետ զրույցում, անդրադառնալով ԵԽԽՎ-ում Հայաստանի նախագահ Սերժ Սարգսյանի ելույթին, նկատեց, որ Սերժ Սարգսյանը ակնհայտ նախապատրաստում է իր ապագա վարչապետությունը: «Դա ակնհայտ է մի քանի քայլերով, բայց նաև հղի է մի շարք խոչընդոտներով, որովհետև կարծում եմ, որ Հայաստանում ապրիլից առաջ արդեն սկսել են խոչընդոտներ առաջանալ և այդ խոչընդոտները շատ զգալի են փոքր մակարդակներով»,- ասաց քաղաքագետը:

Սեդրակյանի խոսքով՝ ապրիլին իշխանության փոփոխությունը, այնուամենայնիվ, հեշտ չի լինելու: «Թանկացումների հետ կապված վայրիվերումները հուշում են, որ այդքան էլ հեշտ չի լինելու այդ տրանսֆերը, որովհետև գրգռելու են ինչ-որ խնդիրներ, իսկ էդ խնդիրները կան, ու մարդկանց դժգոհության թվաքանակն աճելու է»,- կանխատեսեց Սեդրակյանը:

Օրերս ԵԽԽՎ ամբիոնից Հայաստանի նախագահ Սերժ Սարգսյանը հայտարարեց, թե ապրիլից հետո մեր երկրի ընթացքը բարեփոխումների ճանապարհով նոր արագություն է ստանալու՝ հավաստիացնելով, որ քաղաքական կամքի շնորհիվ Հայաստանը կատարել է ԵԽ-ի առջև ստանձնած հիմնական հանձնառությունները: Այս կապակցությամբ Անուշ Սեդրակյանը հետևյալ դիտարկումն արեց. «Ի տարբերություն Ռուսաստանի, Եվրոպան և Միացյալ Նահանգները չեն դնում և չեն հանում Հայաստանի ղեկավար կազմը, չեն մասնակցում ընտրություններին պրոռուսական ընդդիմության տեսքով: Ինձ թվում է, որ դա ավելի շատ մեսիջ էր ուղղված Եվրոպային, որ Սերժ Սարգսյանը մտադիր է իրականացնել ԵՄ-ի հետ ստորագրած համաձայնության շրջանակներում իր անձնական և Հայաստանի պարտավորությունները»:

Անուշ Սեդրակյանը նաև կարծում է, որ հունվարի վերջից ԱՄՆ նոր պատժամիջոցների կիրառումը Ռուսաստանի դեմ անդրադառնալու է նաև Հայաստանի իշխանության վրա, և որ Հայաստանի ԱԳ նախարարի նախկին խորհրդական Ռուբեն Թաթուլյանը՝ Ռոբսոնը, առաջին ծիծեռնակն էր: «Հունվարի վերջին կսկսվի այն գլոբալ «քիմմաքրումը», որի ալիքը Հայաստան կհասնի ապրիլի մոտակայքում, և այդ ժամանակ կտեսնենք, թե ոնց կդասավորվեն ուժերը»,- եզրափակեց քաղաքագետը:

Մանրամասները դիտեք Անուշ Սեդրակյանի հետ Factor.am-ի հարցազրույցում:

Մարինե Խառատյան