09.09.2026 | 23:17
Ինչ են քննարկել Փաշինյանը և Մակրոնը. Կառավարությունը մանրամասներ է ներկայացրել
Գյումրիում 34 փաստաբաններ մեկօրյա գործադուլ են արել. բողոքի ակցիաները շարունակական կլինեն
Հասարակություն
24.01.2018 | 19:05
Գյումրիում 34 փաստաբաններ մեկօրյա գործադուլ են հայտարարել ընդդեմ Դատական նոր օրենսգրքի այն դրույթի, որով դատավորներին հնարավորություն է տրվում փաստաբաններին մինչև 100 000 դրամով տուգանել:
Գյումրեցի փաստաբան Արամայիս Հայրապետյանը մեզ հետ զրույցում ասաց, որ բողոքի ակցիաները կլինեն շարունակական և եթե օրենսդրական այս փոփոխությունը երկրորդ ընթերցմամբ հաստատվի՝ փաստաբաններն արդեն հստակ քայլերի կգնան: «Կարծում եմ, որ փաստաբանների պայքարն արդյունք կտա, քանի որ մեր աշխատանքից է կախված դատարանների, նախաքննական մարմինների աշխատանքը: Եթե մենք փորձենք պարալիզացնել նրանց աշխատանքը, ապա նրանք էլ ստիպված կլինեն հաշվի նստել մեզ հետ»- տեսակետ հայտնեց Հայրապետյանը:
Ըստ նրա, մինչև 100 000 դրամով փաստաբաններին տուգանելու այդ դրույթը փաստաբանների անկախության դեմ կատարված կոնկրետ քայլ է. «Եթե նայենք, թե դատավորն ինչ հիմքերով կարող է սանկցիա կիրառել փաստաբանների նկատմամբ, կտեսնենք, որ դրանք աբսուրդային են: Օրինակ՝ նշվում է դատավորի կարգադրությունը չկատարելը, բայց չի նշվում օրինակա՞ն է այդ կարգադրությունը, թե՞ ոչ: Կամ օրինակ՝ ասվում է դատավորին կամ դատարանին վարկաբեկող գործողություն կատարելը, հիմա ես ձեզ հետ զրույցում ասում եմ, որ դատավորի կազմած ակտը խայտառակություն է: Վարկաբեկեցի՞ դատավորին՝ վարկաբեկեցի: Հիմա սրա համար հաջորդ օրը դատավորը կարող է ասել, որ ինձ տուգանում է 100 000 դրամով»,- մտահոգություն հայտնեց փաստաբանը:
Նշենք, որ առաջին ընթերցմամբ ընդունված այս օրինագծին դեմ են նաև ՓՊ անդամները: Այս դրույթի վերացման համար ստորագրահավաք է սկսվել, որին մասնակցում է 900-ից ավելի փաստաբան:
Լիլիթ Շաբոյան
