«Սասնա ծռերի» 11 անդամների գործով նիստը մեկնարկել էր առանց նրանց մասնակցության

 Երևանի Շենգավիթ վարչական շրջանի ընդհանուր իրավասության դատարանում «Սասնա ծռեր» խմբի 11 անդամի գործով դատական նիստը մեկնարկել էր առանց 10 ամբաստանյալների: Նրանք անցած դատական նիստին լքել էին դահլիճը, դատավորն էլ նրանց նկատմամբ սանկցիա էր կիրառել՝ երեք ժամով հեռացնելով նիստերի դահլիճից:

Խմբի միակ ներկա անդամ Մարտիրոս Հակոբյանը , դիմելով դատավոր Արթուր Օհանյանին, ասաց. «Ես ինչի՞ համար նստեմ, ո՞ւմ համար, Ձեր համա՞ր։ Դուք ստախոս մարդ եք։ Դու ո՞վ ես, ասա իմանամ, ես քեզ չեմ ճանաչում»,- ասաց ամբաստանյալը:

Նա հեռացավ նիստերի դահլիճից, դատավորն էլ կրկին սանկցիա կիրառեց, այս անգամ՝ Հակոբյանի նկատմամբ:

Դատական նիստի ընդմիջումից հետո, նիստերի դահլիճ բերվեցին մյուս ամբաստանյալները: Դատավորը նշեց, որ դեռ պետք է քննարկվի ամբաստանյալների նախկին պաշտպաններին գործում ներգրավելու հարցը:

Հիշեցնենք, որ ամբաստանյալները, հաջակցություն իրենց հացադուլավոր ընկերների, որոշել էին լքել դահլիճը և հայտարարել էին, որ հրաժարվում են նաև պաշտպանների ծառայություններից:

Դատավորի որոշմամբ այսօր հանրային պաշտպաններ ներգրավեցին գործին: Նախագահող դատավորը նշեց, որ պաշտպանները գիտեին, թե ժամը քանիսին է լրանում իրենց պաշտպանյալների սանկցիայի ժամկետը, նրանք, սակայն, նիստին չեն ներկայացել:

Հովհաննես Հարությունյանի պաշտպան Հայարփի Սարգսյանը, ի պատասխան այս պնդման, հանդիմանեց՝ Դուք աղավաղում եք փաստերը:

Նշենք, որր այս գործով կա 11 ամբաստանյալ՝ Արամ Մանուկյան, Հովհաննես Հարությունյան, Թաթուլ Թամրազյան, Արամ Հակոբյան, Տիգրան Մանուկյան, Արայիկ Հակոբյան, Վարդան Գերավետյան, Մարտիրոս Հակոբյան, Սերգեյ Կյուրեղյան, Գևորգ Իրիցյան, Թորոս Թորոսյան:

Դատական նիստը հետաձգվեց՝ մինչ հաջորդ երեքշաբթի:

Լիլիթ Շաբոյան