05.04.2025 | 13:33
ԱՄՆ-ում բնակվող ուկրաինացիներին սխալմամբ նամակներ են ուղարկել՝ պահանջելով լքել երկիրը
Չկարողացանք Փաշինյանի հրաժարականի պահանջը վերածել համաժողովրդական պայքարի. Իշխան Սաղաթելյան. ՏԵՍԱՆՅՈՒԹ
Քաղաքականություն
28.01.2021 | 14:29
29 տարվա մեջ առաջին անգամ բանակի տոնը նշում ենք գլուխներս կախ։ Այս մասին այսօր՝ հունվարի 28-ին, «Եռաբլուր» զինվորական պանթեոնում լրագրողների հետ զրույցում ասաց ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը։
«Հայաստանի բանակը, հայ զինվորն այս պատերազմում չի պարտվել։ Պարտության պատճառը եղել է առաջին հերթին քաղաքական։ Ես վստահ եմ, որ Հայաստանի Հանրապետությունը ունենալու է հզոր բանակ, Հայաստանի սահմանները պաշտպանող բանակ, դա լինելու է մոտ ապագայում»,- նշեց Սաղաթելյանը։
Անդրադառնալով հարցին, թե վերջին շրջանում «17+-ի» կողմից անհնազանդության ակցիաներ չկան, ինչո՞վ է դա պայմանավորված, Սաղաթելյանն ասաց. «Երեկ Հայրենիքի փրկության շարժման խորհուրդը հրավիրել է նիստ, հանդես է եկել հայտարարությամբ։ Առաջին հանրահավաքը նշանակված է փետրվարի 18-ին։ Հայրենիքի փրկության շարժման հայտարարություններն ուժի մեջ են. առաջիկայում լինելու են և՛ բողոքի երթեր, և՛ ցույցեր, և՛ անհնազանդության շարժումներ»։
Սաղաթելյանը նշեց, որ իրենց մեղադրում են ոչ վճռական գործողությունների մեջ, բայց իրենք արդեն նշել են, թե որն է այս կառավարությանը հեռացնելու ճանապարհը. «Նիկոլ Փաշինյանի հեռացման համաժողովրդական պահանջ կա, բայց այդ պահանջը մենք չենք կարողացել վերածել համաժողովրդական պայքարի և վերածելու ենք։ Այն խոսակցությունները, թե շարժումն ավարտվել է, մարել է, դա իրականությանը չի համապատասխանում, որովհետև չեմ կարծում՝ հայրենիքի մեծ մասը հանձնած ու այսքան դժբախտություններ մեր ժողովրդի գլխին բերած իշխանությունը կարող է մնալ իշխանության»։
Սաղաթելյանն ընդգծեց, որ վճռականություն միշտ եղել է և առաջիկայում էլ կլինի։
Անդրադառնալով ՀՀ երկրորդ նախագահ Ռոբերտ Քոչարյանի քաղաքականություն վերադառնալուն, և հարցին, թե 17 կուսակցությունների քաղաքական օրակարգում դրանով պայմանավորված փոփոխություններ կլինե՞ն՝ Սաղաթելյանը նշեց. «Քոչարյանն այլ բան չի ասում, քան ասում է 17-ի շարժումը։ Մենք հրապարակել ենք մեր ճանապարհային քարտեզը, դրան հավատարիմ շարունակում ենք գնալ առաջ, Ռոբերտ Քոչարյանը դրան հակառակ բան, ըստ էության, չի ասել»։
Անդրադառնալով Սուրեն Սուրենյանցի այն հայտարարությանը, թե դուրս է գալիս շարժումից, քանի որ շարժումը ծառայում է Ռոբերտ Քոչարյանին և Սերժ Սարգսյանին, Սաղաթելյանն ասաց, որ դա իրականությանը չի համապատասխանում. «Մենք ոչ մեկին չենք խնդրել, որ շարժմանը միանա, ոչ էլ խնդրելու ենք ինչ-որ մեկին, որ մնա շարժմա մեջ։ Հայտարարությամբ միացել է, հայտարարությամբ դուրս է եկել, Աստված իր հետ»։
Մանրամասները՝ տեսանյութում:
