Եթե տալու ենք Մեղրիի երկաթուղին իրենց կողմից շահագործման, դա մեր շահերին հակասում է․ Գագիկ Աղաջանյան. ՏԵՍԱՆՅՈՒԹ

Ճանապարհների ապաշրջափակման հետ կապված ոչ մի կոնկրետ քայլ, գործողություն չի կարող իրականացվել, քանի դեռ գերիների հարցը չի լուծվել։ «Տնտեսական նոր հնարավորություններ Հայաստանի համար: Ապաշրջափակում. ռիսկերը և առավելությունները: Տնտեսության զարգացման նոր ուղղություններ» թեմայով քննարկման ժամանակ այս մասին հայտարարեց փորձագետ, «Ապավեն» բեռնափոխադրող ընկերության գործադիր տնօրեն Գագիկ Աղաջանյանը։
«Չի կարող լինել տնտեսական ոլորտում համագործակցություն, երբ մենք այդքան ցավոտ՝ գերիների և աճյունների փոխանակման հարցում համաձայնության չենք գալիս»,- ասաց Աղաջանյանը։
Ինչ վերաբերվում է ճանապարհների ապաշրջափակման շուրջ մտահոգություններին, փորձագետի կարծիքով, դրանք իրենց մեջ իրոք ռիսկեր են պարունակում և այդքան էլ շահեկան չեն ՀՀ-ի համար։ «Առաջին հայացքից թվում է, թե ճանապարհ է բացվում, ինչ վատ բան կա դրա մեջ, բայց իմ կարծիքով` ցանկացած ճանապարհ բացելուց առաջ պետք է դիտարկվի յուրաքանչյուր ճանապարհի վերականգնման և շահագործման նպատակահարմարությունը, մեր տնտեսության մեջ դրա դերը և նշանակությունը»:
««Հայտնի ճանապարհը» չգիտես ինչու` բոլորի մոտ ընկալվում է Հորադիզից երկաթուղային ճանապարհի կառուցումը դեպի Մեղրի, Մեղրիից դեպի նախիջևան, ապա Երասխով Երևան։ Այդ ճանապարհի մասին այսօր խոսել կամ դարձնել առհասարակ քննարկման` տեղին չէ, դեռ շատ վաղ է։ Դա վերջին թեման է տրանսպորտային կոմունիկացիաների ապաշրջափակման, որի մասին կարելի է խոսել… Հորադիզից դեպի Երևան ճանապարհը չի վերականգնվելու, այլ կառուցվելու է»,- ասաց Աղաջանյանը։

«Եթե տալու ենք Մեղրիի երկաթուղին իրենց կողմից շահագործման, դա մեր շահերին հակասում է»,- ընդգծեց Աղաջանյանը:

Մանրամասները՝ տեսանյութում: