Ինչու են պատերազմի ժամանակ Փաշինյանի ու Տոնոյանի միջև խնդիրներ առաջացել. արձագանքում են նաև ԳՇ֊ից. ՏԵՍԱՆՅՈՒԹ

Արցախյան երկրորդ պատերազմի ավարտից շուրջ երեք ամիս անց պաշտպանության նախկին նախարար Դավիթ Տոնոյանը մեղադրական սլաքներն ուղղում է վարչապետ Նիկոլ Փաշինյանի կողմը: «Մեդիամաքս»-ի հետ զրույցում Տոնոյանն ասել է՝ Գլխավոր շտաբի պետ Օնիկ Գասպարյանը 2020 թվականի հունիսի 12-ին Անվտանգության խորհրդի նիստում իր հետ համաձայնությամբ է զեկուցել այն մասին, որ «մեր հակառակորդը ոչ միայն Ադրբեջանն է, այլև Թուրքիան, ուստի անհրաժեշտ է քաղաքական ու դիվանագիտական ողջ ներուժն ուղղել պատերազմից խուսափելուն կամ գոնե այն հետաձգելուն»: Նախկին նախարարը նաև հավելել է, որ պատերազմի 4-րդ օրը, երբ Օնիկ Գասպարյանն ասել է՝ 2-3 օրվա ընթացքում անհրաժեշտ է մարտական գործողությունները դադարեցնել, նույնպես իր հետ համաձայնեցված է եղել: Դավիթ Տոնոյանի խոսքերի ենթատեքստում, փաստորեն, այն է, որ ռազմական ղեկավարությունն իր պարտականությունները կատարել է անթերի, իսկ քաղաքական ղեկավարությունը հետևողական չի եղել և պատերազմն օր առաջ կանգնեցնելու քայլեր չի ձեռնարկել:

ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը Factor TV-ի հետ զրույցում ասաց՝ Դավիթ Տոնոյանը պետք է պատասխանի հարցին, թե ինչու հայկական կողմը պատրաստ չէր լայնածավալ պատերազմի: Նա շեշտեց՝ Տոնոյանը պատերազմից առաջ բանակի խնդիրների մասին չի խոսել:

Անդրանիկ Քոչարյանն իր հերթին մեղադրական սլաքները վերահասցեավորեց Դավիթ Տոնոյանի ուղղությամբ:

Պաշտպանության նախկին փոխնախարար, ՀՀԿ-ական Արտակ Զաքարյանն էլ այն տեսակետին է, որ Դավիթ Տոնոյանը պետք է խոսեր պատերազմի և պարտության առանցքային պատճառների մասին: Նրա խոսքով՝ Տոնոյանն անմիջական պատասխանատվություն էր կրում բազմաթիվ հարցերի վերաբերյալ, որոնք որոշիչ են եղել մեր պարտության մեջ, բազմիցս բարձրաձայնվել են ընդդիմության կողմից և մինչ օրս մնացել են անպատասխան։

Ինքը՝ Դավիթ Տոնոյանը պատերազմի ընթացքում իր նշանակալի բացթողումը համարել է այն, որ պատերազմի պայմաններում չի կարողացել հաղթահարել վարչապետի, պաշտպանության նախարարության և Գլխավոր շտաբի միջև առաջացած անհստակությունը և դրա հետևանքով առաջացող խոչընդոտները։ Արտակ Զաքարյանն ասում է՝ Տոնոյանը մեղադրանքներն ուղղում է նաև վարչապետին:

Որպես այս խնդրի հիմնավորում՝ Տոնոյանը նշել է այն, որ 2015 թվականին ընդունված նոր Սահմանադրությամբ պատերազմի ժամանակ պաշտպանության նախարարը փաստացի դուրս է մնում ռազմական գործողությունների պլանավորման և վարման գործընթացից, քանի որ այդ լիազորությունները վերապահվում են Գերագույն հրամանատարին և Զինված ուժերի Գլխավոր շտաբի պետին։ Անդրանիկ Քոչարյանն էլ հակադարձում է՝ Դավիթ Տոնոյանի կողմից օրենսդրական փոփոխությունների նախագիծ, որպես հանձնաժողովի նախագահ, չի ստացել, որով, ըստ Քոչարյանի, հնարավոր կլիներ ՊՆ-ԳՇ և վարչապետ համագործակցությունն ավելի արդյունավետ դարձնել:

Դավիթ Տոնոյանի նշած՝ վարչապետ-պաշտպանության նախարարություն-Գլխավոր շտաբ ենթադրյալ խոչընդոտների մասին Factor TV-ն մեկնաբանություն խնդրեց նաև Զինված ուժերի ԳՇ պետի առաջին տեղակալ Տիրան Խաչատրյանից: Վերջինն ասաց՝ նման տեղեկություններ իրեն հայտնի չեն:

Արդյո՞ք Դավիթ Տոնոյանի և բարձրաստիճան մյուս պաշտոնյաների հայտարարություններն օբյեկտիվ քննությունների առարկա կդառնան իրավապահների կողմից և կտրվեն սպառիչ պատասխաններ՝ հայտնի չէ: Անդրանիկ Քոչարյանը մեզ հետ զրույցում պնդեց՝ հիմա Արցախյան երկրորդ պատերազմի հանգամանքներն ուսումնասիրող քննիչ հանձնաժողով ստեղծելու ժամանակը չէ:

Մանրամասները՝ տեսանյութում։

Նարեկ Կիրակոսյան