Դավիթ Տոնոյանն իր դեմ ինքնախոստովանական ցուցմունք է տվել. Անդրանիկ Քոչարյան. ՏԵՍԱՆՅՈՒԹ

Պաշտպանության նախկին նախարար Դավիթ Տոնոյանը նախօրեին տված հարցազրույցում նշել է, որ Գլխավոր շտաբի այն զգուշացումը, թե պետք է պատերազմը երկու-երեք օրում դադարեցնել, որովհետև հնարավորություն չունենք դիմակայելու, քանի որ մեր դեմ ոչ միայն Ադրբեջանը, այլ նաև Թուրքիան է կռվում, իր հետ համաձայնեցված է եղել: Նրա ասածի ենթատեքստում այն է, որ քաղաքական ղեկավարությանը տեղեկացրել են այդ մասին, սակայն, ի դեմս Նիկոլ Փաշինյանի, քաղաքական ղեկավարությունը քայլեր չի ձեռնարկել:

Factor.am-ի հետ զրույցում ԱԺ «Իմ քայլը» խմբակցության պատգամավոր Անդրանիկ Քոչարյանը, անդրադառնալով այս դիտարկմանը և հարցին՝ ինչպե՞ս է գնահատում այս բացահայտումները, ընդգծեց. «Ես այդտեղ բացահայտում չեմ տեսնում: Նախկին բարձրաստիճան պաշտոնյաները, երբ ազատվում են պաշտոնից, որոշ ժամանակ պաուզա պետք է պահեն, հարցազրույցներով հանդես չպետք է գան և չպետք է մտնեն քաղաքական անցուդարձերի մեջ: Դա է պահանջում մեր երկրի անվտանգությունը: Նման հարցազրույցներով նրանք վնասում են առանց այն էլ տկարացած մեր անվտանգությունը: Պարոն Տոնոյանը լավ կլիներ՝ էկրանի առաջ տար պաշտոնից ազատվելուց հետո իր առաջին հարցազրույցը, և պարզ երևար՝ առնչություն ունի՞, արդյոք, 17+-ի հետ, թե՞ ուզում է փակագծեր բացել, որոնց մասին արդեն շահարկումներ կան: Պատերազմի մասին չպետք է խոսի նախկին պաշտպանության նախարարը, պատերազմի և նրա հետևանքների մասին պետք է այլ ժամանակահատվածում խոսի պրոֆեսիոնալ ձևավորված հանձնաժողովը, և պարոն Տոնոյանին ևս պետք է հարցեր ուղղի, թե ինչո՞ւ մենք պատրաստ չէինք լայնածավալ պատերազմի, հատկապես՝ քառօրյա պատերազմից հետո: Հարց է առաջանում՝ այս երկու տարվա ընթացքում պարոն Տոնոյանն իրո՞ք ՀՀ գերագույն գլխավոր հրամանատարին կամ վարչապետին, Անվտանգության խորհրդին զեկուցել է, որ մենք պատրաստ չենք լինելու, եթե սկսվի լայնածավալ պատերազմ: Պատերազմի ընթացքում, եթե խոսվում է այս հարցերի մասին, դա վտանգավոր է։ Այսինքն՝ ժողովրդին թողնում ենք անպաշտպա՞ն: Պետք էր այդ մասին ավելի շուտ խոսել, իսկ պատերազմի ընթացքում պետք էր կառավարել պատերազմական գործողությունները: Կառավարման սխալների հետևանքներն ու պատճառները պետք է վերլուծել և ոչ թե պետք է հանդես գալ քաղաքական տեքստերով: Նախկին պաշտոնյաները պետք է պատրաստ լինեն, կգա մի պահ, որ իրենց շատ լուրջ հարցեր կտրվեն: Հիմա դավաճաններ փնտրելու ժամանակը չէ: Պետք է աջակցել բանակի կարողությունների վերականգնմանը»:

Անդրադառնալով դիտարկմանը, որ, փաստորեն, պատգամավորը չի ժխտում Դավիթ Տոնոյանի ասածները, այլ պարզապես պնդում է, որ Տոնոյանը հիմա չպետք է խոսի, Անդրանիկ Քոչարյանը նշեց. «Ես երբևիցե չեմ լսել, որ Դավիթ Տոնոյանն ասի, թե բանակի վիճակն այնպիսին է, ինչպիսին ներկայացվեց պատերազմի ընթացքում: Նա չթռչող ինքնաթիռների մեջ նկարահանվում էր և մատով ցույց տալիս հակառակորդի ուղղությամբ: Նիկոլ Փաշինյանն անում էր անզգույշ հայտարարություններ, բայց նա պաշտպանության նախարար չի եղել, նա չէ Գլխավոր շտաբի պետը: Մեր Սահմանադրության պահանջն է, որ պատերազմը պետք է կառավարի Գլխավոր շտաբը՝ իր ռազմական մասնագետների միջոցով և իր հաստատած պլաններով: Լինում են հաջողված նշանակումներ և չհաջողված նշանակումներ: Մենք պետք է ընդունենք մեր ձախումները և վերլուծենք դրանց պատճառները: Մենք 94-ից հետո տարիներ շարունակ, հատկապես՝ Հոկտեմբերի 27-ից հետո, մսխել ենք բանակի մարտունակ լինելու կարգավիճակը, հաղթանակի հետևում տկարացրել ենք մեր բանակի հնարավորությունները, խզում ենք առաջացրել կադրային բանկում: Այս պարտությունից հետո մենք դատապարտված ենք խելքներս գլուխներս հավաքել և կառուցել մարտունակ բանակ և վերացնել անտարբերությունը»:

Անդրանիկ Քոչարյանը նաև կարծիք հայտնեց, որ Տոնոյանի այդ հարցազրույցը ինքնախոստովանական ցուցմունք է իր դեմ:

Հարցազրույցն ամբողջությամբ՝ տեսանյութում։

Նարեկ Կիրակոսյան