ՀՀ Գլխավոր դատախազությունը Սերժ Սարգսյանի հայտարարության մեջ հանցագործության հատկանիշներ չի տեսել. ՀՔԱՎ

ՀՀ Գլխավոր դատախազությունը պատասխանել է 2017թ. դեկտեմբերի 9-ին Սերժ Սարգսյանի արած հայտարարության հիման վրա քրեական գործ հարուցելու վերաբերյալ՝ ՀՔԱ Վանաձորի գրասենյակի հաղորդմանը:

ՀՔԱ Վանաձորի գրասենյակը հանցագործության մասին հաղորդում էր ներկայացրել 2017 թ. դեկտեմբերի 13-ին և պահանջել քրեական գործ հարուցել Տեղական ինքնակառավարման և տարածքային կառավարման մարմիններին նվիրված Դիլիջանում կայացած խորհրդաժողովի ընթացքում Սերժ Սարգսյանի արած հայտարարության հիման վրա:

Այդ հայտարարությամբ Ս. Սարգսյանը մասնավորապես նշել էր. «Գաղտնիք չէ, որ շատ համայնքապետեր չարաշահում են իրենց պաշտոնը և այն օգտագործում են անհասկանալի և անընդունելի եկամուտներ ունենալու համար՝ սկսած նրանից, որ տարբեր խորամանկություններով, տարբեր ձևերով օտարում են համայնքներին պատկանող հողերը, որ անազնիվ վերաբերմունք են ցուցաբերում համայնքային բյուջեների նկատմամբ»։

Ապա հավելել էր. «Շատ ներողամիտ ենք եղել համայնքապետների նկատմամբ: Ներողամիտ ենք եղել, որովհետև համարել ենք, որ պետք է կայանան, այս ինստիտուտը պետք է կայանա, և այս ընթացքում հնարավոր են որոշակի վատ դրսևորումներ։ Ուզում եմ բոլորիդ, ոչ մեկին չեմ վախեցնում, ուղղակի ուզում եմ բոլորիդ զգուշացնել` եթե որևէ մեկը պետք է այս գործերով զբաղվի, ավելի լավ է գնա ուրիշ տեղ աշխատի: Մենք պատրաստ չենք տեսնելու, թե ձեզնից ոմանք ինչպես են մեր բնակչության փողերը տանում իրենց տուն: Ամոթ է»։

ՀՔԱ Վանաձորի գրասենյակը արձանագրել էր, որ Սերժ Սարգսյանը միտումնավոր կոծկել է համայնքապետերի կատարած հանցագործությունները, որի հետևանքով դրանք իրավական գնահատականի չի արժանացել: Այս հիմքով ՀՔԱ Վանաձորի գրասենյակը պահանջել էր քրեական պատասխանատվության ենթարկել Ս. Սարգսյանին, նրա հայտարարության մեջ հիշատակված համայնքների ղեկավարներին և վերջիններիս ներելու համար միջնորդ հանդիսացած անձանց՝ ՀՀ Քրեական օրենսգրքի մի շարք հոդվածներով, այդ թվում՝ պաշտոնեական լիազորությունները չարաշահելու, հանցագործությունը պարտակելու, կաշառք ստանալու կասկածի հիմքով: