«Մի հատ նկար նայելու համար երեք տարի դատում են». Ս. Բաբայանի գործով մեղադրյալ

ԼՂՀ Պաշտպանության բանակի նախկին հրամանատար Սամվել Բաբայանի՝ Առաջին ատյանի դատարանի որոշման դեմ վերաքննիչ բողոքի գործով դատական նիստը հետաձգվեց՝ աշխատանքային օրվա ավարտի պատճառաբանությամբ:

Նիստի ընթացքում նախկին հրամանատարը հարց հնչեցրեց՝ ինչու դատարան չի բերվում զենքի առքուվաճառքը կազմակերպած անձը, ում վերջերս Վրաստանում ձերբակալել էին. «Ապրանք բերող, ծախող, առնողը չկա՞, բերեք ստեղ՝ տեսնենք ո՞վ ա»,- պահանջեց Բաբայանը:

Ամբաստանյալ Սանասար Գաբրիելյանը հայտարարեց. «Մի հատ նկար նայելու համար երեք տարի դատում են: Էդ, որ գնացել հայրենիք ենք պաշտպանել, դա չի հաշվվում, որ ուզել ենք էլի հայրենիքին օգնենք՝ պիտի դատե՞ն: Մտադիր եմ եղել բանակին օգնելու համար զենք բերել, բայց տեսել եմ, որ տրուբա ա, ես ասել եմ՝ դա տրուբա ա մի բերեք, մեզ պետք չի: Ես որ ընտրությունների ժամանակ իմ ընկերներին «քյոմագ եմ» արել, դա ա պատճա՞ռը էս դատավարության»,- հայտարարեց ամբաստանյալը:

Սամվել Բաբայանի պաշտպանը՝ Ավետիս Քալաշյանը, ներկայացնելով իր բողոքը, ասաց, որ Սամվել Բաբայանին ուղղված մեղադրանքները պատճառաբանված ու հիմնավորված չեն: «Նշեմ, որ դատավճռում արձանագրվել է, որ Սամվել Բաբայանը դրդել է ապօրինի կերպով զենք ձեռք բերել, ես գտնում եմ, որ նման ձևակերպմամբ Առաջին ատյանի դատարանը խախտել է օրենքը և դուրս եկել մեղադրանքի սահմաններից: Ողջ նախաքննության և դատաքննության ընթացքում այդպես էլ պարզ չդարձավ, թե ինչու, ինչ նպատակով է Բաբայանը դրդել ձեռք բերել ապօրինի ռազմամթերք»,- նշեց փաստաբանը:

Նա նաև ասաց, որ Սամվել Բաբայանը ընդամենը Սանասար Գաբրիելյանի ցույց տված լուսանկարն է տեսել, որտեղ պատկերված է եղել «Իգլայի» մասնիկ, Բաբայանն ասել է, որ դա պիտանի չէ, և Գաբրիելյանը չգնի դա:

Անդրադառնալով Բաբայանի կողմից ամբաստանյալներին հիսուն հազար դոլարով շահագրգռելուն և զենքի ձեռքբերման դրդմանը՝ Քալաշյանը նշեց, թե հատուկ մարմինները ընդամենը հեռախոսազրույց են լսել, որտեղ նշվել է հիսուն հազարի մասին, և միանգամից, առանց լուրջ հիմնավորումների, մտածել են, որ Բաբայանը խոստացել է զենքի ձեռք բերման համար այդ գումարը վճարել: Դատավորները փաստաբանին ընդհատեցին՝ տեղեկացնելով, որ աշխատանքային օրն ավարտին է մոտենում և այդպիսով նիստը հետաձգվեց:

Հաջորդ դատական նիստը կկայանա փետրվարի 2-ին՝ ժամը 12.00-ին:

Լիլիթ Շաբոյան