Ահազանգից օրեր անց՝ Բնապահպանության նախարարությունն այսօր նոր Թեղուտ է հասել

«Այս պահին Լոռու մարզի աշխատակիցները տեղում են, ուսումնասիրում են տարածքը, որպեսզի պարզվի ահազանգի իսկությունը և համապատասխան միջոցառումներ ձեռնարկվեն», – մեզ հետ զրույցում, անդրադառնալով հունվարի 19-ից Թեղուտի պոչամբարից արտահոսքերի մասին ահազանգերին՝ ասաց Բնապահպանության և ընդերքի տեսչական մարմնի մամուլի խոսնակ Վրույր Պեպանյանը:

Հիշեցնենք, որ հունվարի 19-ին իրավապաշտպան Արթուր Սաքունցն իր ֆեյսբուքյան էջում գրառում էր կատարել՝ ահազանգելով․ «Հավաստի տվյալների համաձայն՝ Թեղուտի պոչամբարի պատվարում ճեղքեր են առաջացել, որի հետևանքով առնվազն չորս օր է պոչամբարի թափոնները հոսում և լցվում են Դեբեդ գետը: Սա լուրջ էկոլոգիական աղետների պատճառ կարող է հանդիսանալ նաև անդրազգային մակարդակով, քանի որ Դեբետը հոսում է դեպի հարևան Վրաստանի սահմանը: Ըստ որոշ տեղեկությունների՝ այս աղետի մասին տեղեկատվության արտահոսքը հնարավոր միջոցներով փորձում են կանխել իրավապահ մարմինների ներգրավմամբ»:

Վրույր Պեպանյանը հիշեցնում է՝ իրենց տեսչական կառույցը օգոստոսից է գործում, դրանից առաջ կատարվածի մասին մեկնաբանություն տալ չի կարող: Նա նաև շտապում է ընդգծել, որ «Թեղուտ» ՓԲԸ-ն ներառվել է իրենց տարեկան ստուգումների ցանկում, ինչը նշանակում է, որ առաջիկա մեկ տարում ստուգումներ կիրականացվեն ընկերությունում: Իսկ մինչ այդ, ինչպես մեզ հետ զրույցում նշեց Շնող համայնքի բնակիչ Լևոն Ալիխանանյանը, ջուրը մաքրում տանում է ամեն ինչ, և երբ հանձնաժողովը տեղ է հասնում՝ արդեն տեսանելի երևույթներ չեն լինում:

Հիշեցնենք, որ անցած նոյեմբերին Factor.am-ը այցելել էր և տեղում արձանագրել, որ Դեբեդ գետը աղտոտված է:

Լիլիթ Շաբոյան