02.11.2026 | 14:49
Պլանային ջրանջատում Երևանում և Կոտայքի մարզում
Մենք ձախողել ենք մետաղական հանքարդյունաբերության հարցով քննիչ հանձնաժողովի գործունեությունը․ Բաբկեն Թունյան. ՏԵՍԱՆՅՈՒԹ
Քաղաքականություն
19.01.2021 | 12:12
«Մենք ձախողել ենք քննիչ հանձնաժողովի գործունեությունը և դրա մեջ ես իմ մեղքի բաժինը տեսնում եմ»,- Ազգային ժողովում «Մետաղական հանքարդյունաբերության ոլորտում ներդրումային ծրագրերի շրջանակներում գործադիր իշխանության մարմիններին ներկայացված և նրանց կողմից ընդունված ֆինանսական և այլ հաշվետվությունների օրինականությունը հիմնավորվածությունը և արժանահատավությունն ուսումնասիրող քննիչ հանձնաժողովի» կատարած աշխատանքների վերաբերյալ զեկույցի քննարկման ժամանակ հայտարարեց «Իմ քայլը» խմբակցության պատգամավոր Բաբկեն Թունյանը:
«Սա այն չէր, ինչ պետք է աներ այս հանձնաժողովը. հանձնաժողովը պետք է պարզեր այս ընկերությունների ֆինանսական և այլ հաշվետվությունների օրինականությունը, հիմնավորվածությունը, արժանահավատությունը: Սակայն պարզելու համար մենք ռեսուրսներ չունենք»,- նշեց Թունյանը:
Նա նշեց, թե 5 հանքավայր էին առանձնացրել հետազոտություններ իրականացնելու համար և բաշխել դրանք հանձնաժողովի անդամների մեջ. «Ցավոք, այդ հինգ հանքավայրի մասով մենք բավարար ինֆորմացիա չստացանք, և կան ընկերություններ, որոնց հաշվետվությունն ընդհանրապես չես կարողանում գտնել։ Եթե որևէ լրագրող հետաքննություն աներ ու ռեսուրսներ տրամադրեր սրա վրա, ավելի շատ կբացահայտեր, քան մենք»։
Թունյանի խոսքով՝ ըստ էության քննիչ հանձնաժողովը ստեղծվեց մեկ հանքարդյունաբերական ընկերության ներդրումային ցուցանիշները կասկածի տակ դնելու համար:«Ամբողջ ընթացքում մենք հիմնականում լսել ենք բնապահպանական ակտիվիստներին, որոնք խոսել են մեկ ընկերության մասին, որը չի աշխատում։ Օրինակ, խոսում եք «Լիդիան Արմենիայի» մասին։ Այդ ընկերությունը չէր կարող շահույթ ունենալ, որովհետև չի էլ շահագործել»։
Պատգամավորը նշեց, որ սա թող դաս լինի, որ հաջորդ անգամ քննիչ հանձնաժողով ստեղծելն ինքնանպատակ չլինի. «Որ հաջորդ անգամ մենք մեր ուժերը բավարար գնահատենք ու տեսնենք՝ եթե մի բանը կարողանալու ենք անել, մտնենք դրա տակ, եթե չենք կարողանալու, ավելի լավ է սկզբից իզուր սպասումներ չձևավորենք։ Դա ոչ միայն ռեսուրսների վատնում է, այլ Ազգային ժողովի հեղինակությանը լուրջ հարված է հասցնում»։
Մանրամասները՝ տեսանյութում:
