ԵՐԵՎԱՆԻ ԺԱՄԱՆԱԿՈՎ. «Նախագահը հրավիրում է մտավորականների, որոնք չարաճճիություն չեն անի, դեմ չեն խոսի». Էդուարդ Զորիկյան

«Իմ կարծիքով՝ բացարձակ էական չէ, թե ով կլինի ՀՀ 4-րդ նախագահի պաշտոնում, քանի որ ապագա նախագահի ձեռքից վերցրել են ազդեցության բոլոր լծակները: Որքան էլ նա ազդեցիկ մարդ լինի, ի՞նչ պետք է անի, ռեալ՝ ոչինչ: Նախագահի պաշտոնը ներկայացուցչական բնույթ է կրելու, դրա լինել-չլինելուց ոչինչ չի փոխվելու: ՀՀԿ-ն շարունակելու է իրականացնել իր քաղաքական ծրագիրը»,- նման տեսակետ է հայտնում երգիչ, երգահան Էդուարդ Զորիկյանը՝ Factor.am-ի «Երևանի ժամանակով» զրուցաշարի շրջանակում՝ անդրադառնալով այն փաստին, որ Սերժ Սարգսյանը ներկայացրել է ՀՀԿ-ի կողմից առաջադրած հանրապետության նախագահի թեկնածուի՝ Մեծ Բրիտանիայում և Իռլանդիայում ՀՀ դեսպան, ՀՀ նախկին վարչապետ Արմեն Սարգսյանի անունը:

Արվեստագետն անդրադառնում է նաև «Ելք» դաշինքի կողմից թանկացումների դեմ կազմակերպված երթին: Նրա խոսքով՝ եթե քաղաքացին սոցիալական պետությունում չի ապրում, ինքն է ոտքի կանգնում և պահանջներ ներկայացնում: «Սոցիալական պետությունը պետք է սահմանի աշխատավարձերի, թոշակների բարձրացում, որպեսզի հասարակ ժողովրդի վրա թանկացումներն այս աստիճան չազդեն»,- ասում է նա:

Խոսելով օրերս կայացած մտավորականների հետ նախագահ Սերժ Սարգսյանի հանդիպման մասին, Է. Զորիկյանը նկատում է. «Նախագահը հրավիրում է մտավորականների, որոնք վստահելի են, չարաճճիություն չեն անի, դեմ չեն խոսի, կառաջարկեն միայն այն, ինչ իրենց նախապես ուղարկվում է մեյլով: Իսկ ուրիշ մտավորականներ կարող են գնալ ու բարձրացնել, օրինակ, քաղբանտարկյալների հարցը»:

Երգահանն անդրադառնում է նաև Ազգային ժողովի պատգամավոր, երգչուհի Շուշան Պետրոսյանի՝ ամբիոնից հնչեցրած հայրենասիրության մասին խրատական ելույթին: «Խորհուրդ տալիս են այն ժամանակ, երբ հարցնող է լինում»,- շեշտում է նա:

Մանրամասները՝ տեսանյութում:

Աննա Բաբաջանյան