Ռուբինյանին որևէ բան բացատրելու պարտավորություն չունեմ․ Սոֆյա Հովսեփյանը՝ հնչած քննադատության մասին. ՏԵՍԱՆՅՈՒԹ

«Իմ դեմ սկսեցին մեծ արշավ, փորձեցին հեղինակազրկել՝ կեղծ էջերով ինֆորմացիա տարածելով, բայց դա նրանց չհաջողվեց»,- այս մասին Factor.TV-ի հետ զրույցում ասաց ԱԺ պատգամավոր Սոֆյա Հովսեփյանը՝ անդրադառնալով «Իմ քայլը» խմբակցությունից դուրս գալու մասին իր հայտարարությանը հաջորդած քննադատություններին, որ հնչեցրին իմքայլական գործընկերները:

Նրա խոսքով՝ իր հայտարարությունը նախորդել էր հունվարի 11-ի մոսկովյան եռակողմ հանդիպմանը, և, թերևս, իր խմբակցությունից դուրս գալու մասին հայտարարություններով ու գրառումներով շեղում էին մարդկանց ուշադրությունը. « Բայց դա երկար չտևեց, որովհետև մարդիկ հասկացան, որ հունվարի 11-ի օրը և դրա հետևանքները շատ ավելի կարևոր էր, քան խմբակցությունից իմ դուրս գալը»:

Անդրադառնալով քննադատությանը, որ խմբակցությունից դուրս եկող պատգամավորները բարոյական իրավունք չունեին լքելու խմբակցությունը, քանի որ Նիկոլ Փաշինյանի շնորհիվ էին ընտրվել, Հովսեփյանը նշեց. «Իսկ ի՞նչ ասել է բարոյական իրավունք, թող այդ հարցին պատասխանեն»:

Հիշեցնենք  «Իմ քայլից» Ռուբեն Ռուբինյանը, գրել էր, թե խմբակցությունը լքած պատմգավորները պետք է առնվազն բացատրեն, թե ում և ինչ մանդատով են շարունակում լինել պատգամավոր՝ ոչ թե փաստաթղթային, այլ քաղաքական համատեքստում։

Սոֆյա Հովսեփյանը արձագանքելով Ռուբինյանի տեսակետին՝ նշեց, որ նրան, ինչպես և որևէ այլ պատգամավորի, որևէ բան բացատրելու ո՛չ ցանկություն, ո՛չ պատրաստակամություն, ո՛չ էլ պարտավորություն ունի: «Ես իմ քայլերի համար նախևառաջ ինքս ինձ եմ հաշիվ տալիս, և հետո նաև ինձ ընտրողներին»,- ասաց պատգամավորը:

Մանրամասները՝ տեսանյութում: