Հայաստանի քաղաքական ուժերը կփորձեն հաճոյանալ ապագա նախագահին. Ավետիք Իշխանյան

Հայաստանի Հելսինկյան կոմիտեի նախագահ Ավետիք Իշխանյանի կարծիքով՝ ի սկզբանե պարզ էր, որ Հայաստանի ապագա նախագահի թեկնածուն պետք է լինի մարդ, ոըը չի ունենա քաղաքական հավակնություններ:

«Արմեն Սարգսյանն, իհարկե, բավական հետաքրքիր կենսագրություն ունի, խոշոր գործարար է և շատ զարմանալի է, որ այդ տեսակ մարդը ընտրվեց որպես նախագահի թեկնածու: Բացի այդ, 1996 թվականին նա նշանակվեց Հայաստանի վարչապետ և մի քանի ամիս անց հեռացավ պաշտոնից՝ առանց բացատրություն տալու: Հարց է առաջանում՝ ի՞նչ երաշխիք կա, որ նա, ինչ-ինչ հարցերից նեղանալով՝ էլի չի հեռանա»,- նկատեց Ավետիք Իշխանյանը:

Նշենք, որ այսօր պաշտոնապես հաստատվեց, որ Հայաստանի 4-րդ նախագահի պաշտոնում իշխող Հանրապետականն առաջադրելու է նախկին վարչապետ, Մեծ Բրիտանիայում Հայաստանի դեսպան Արմեն Սարգսյանին:

Ըստ Իշխանյանի՝ Սարգսյանը կարևորել է նաև այն, որ Հայաստանի ապագա նախագահը Հայաստանում չունենա քաղաքական արմատներ: «Վերջին շրջանի քաղաքական զարգացումներից պարզ էր, որ քաղաքականության մեջ հավակնություններ ունեցող գործիչները կամաց-կամաց մեկուսացվում են, և բարձր պաշտոնների նշանակվում են անձինք, որոնք քաղաքական հավակնություններ չունեն: Ազգային ժողովի նախագահի պաշտոնում Արա Բաբլոյանի նշանակումը կապված էր այն բանի հետ, որ նա քաղաքական գործիչ չի եղել և քաղաքական հավակնություններ առանձնապես չի ունեցել»,- նշեց Հայաստանի Հելսինկյան կոմիտեի նախագահը:

Սերժ Սարգսյանն ընդգծել է, որ կուզենա Հայաստանի 4-րդ նախագահն ընտրվի լայն համաձայնությամբ: Իշխանյանի կարծիքով՝ Հայաստանի քաղաքական ուժերը, հարմարվում են իրավիճակին և գիտակցելով, որ նա միևնույն է ընտրվելու է, կփորձեն հաճոյանալ նրան:

Հարցազրույցն ամբողջությամբ՝ տեսանյութում:

Շողիկ Գալստյան