Փոփոխություններ Զինծառայողների ապահովագրության հիմնադրամին կատարվող վճարումների դրույքաչափերում․ ԱԺ-ն ընդունեց առաջին ընթերցմամբ

ՀՀ Ազգային ժողովն այսօրվա արտահերթ նիստում առաջին ընթերցմամբ ընդունեց «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» Հայաստանի Հանրապետության օրենքում լրացումներ և փոփոխություններ կատարելու մասին օրինագիծը, որով նախատեսվում է բարձրացնել Զինծառայողների ապահովագրության հիմնադրամին կատարվող վճարումների դրույքաչափերը:

Օրենքի նախագիծն ընդունվեց միաձայն՝ 90 կողմ ձայներով։

«Քանի որ կատարված բոլոր հաշվարկներով մենք արձանագրել ենք, որ հիմնադրամի գումարները բավարար չեն լինելու՝ մեր բոլոր հայրենակիցների հատուցումը ժամանակի ընթացքում տրամադրելու համար, փոխվել են հավաքագրվող դրոշմանիշային վճարների դրույքաչափերը և որդեգրվել է կիսապրոգրեսիվ համակարգը: Մասնավորապես, այժմ համապատասխան եկամտի չափին համապատասխանելու է որոշակի ֆիքսված գումար, որը վճարվելու է հատուցման հիմնադրամին»,- ներկայացնելով նախագիծը՝ ասաց արդարադատության նախարար Ռուստամ Բադասյանը:

Օրենքի նախագծի ամբողջությամբ ընդունման դեպքում՝ ֆիզիկական անձինք դրոշմանիշային վճարը վճարում են հետևյալ դրույքաչափով. մինչև 100․000 դրամ հաշվարկման բազայի դեպքում՝ 1․500 դրամ, 100․001-ից մինչև 200․000 դրամ հաշվարկման բազայի դեպքում՝ 3․000 դրամ, 200․001-ից մինչև 500․000 դրամ հաշվարկման բազայի դեպքում՝ 5․500 դրամ, 500․001-ից մինչև 1․000․000 դրամ հաշվարկման բազայի դեպքում՝ 8․500 դրամ, 1․000․001 դրամ և ավելի հաշվարկման բազայի դեպքում՝ 15․000 դրամ։

Անհատ ձեռնարկատերերը և նոտարները դրոշմանիշային վճարը վճարում են հետևյալ դրույքաչափով. մինչև 1․200․000 դրամ հաշվարկման բազայի դեպքում՝ 18․000 դրամ և այդ սկզբունքով սանդղակը բարձրանում է: