Հայ-Ռուսական համալսարանը և Ցյուրիխի համալսարանը կհամագործակցեն

ՀՌՀ մամուլի ծառայությունից տեղեկացնում են, որ Հայ-Ռուսական համալսարանի Իրավունքի և քաղաքականության ինստիտուտի Համաշխարհային քաղաքականության և միջազգային հարաբերությունների ամբիոնը՝ Ցյուրիխի համալսարանի Արևելաեվրոպական ուսումնասիրությունների կենտրոնի հետ համատեղ, ստացել է ԱՊՀ պետությունների համար նախատեսված և Ժնևի համալսարանի կողմից համակարգվող հետազոտական դրամաշնորհ։

ՀՌՀ-ի Համաշխարհային քաղաքականության և միջազգային հարաբերությունների ամբիոնի հաղթած ծրագրի թեման է «ԵՄ աշխարհաքաղաքական ապագան. ԵՄ-ի քաղաքականության հեռանկարների քարտեզագրումն արևելյան հարևանության տարածաշրջանում», որի տևողությունը 18 ամիս է և այդ ընթացքում նախատեսվում է անցկացնել երկու կոնֆերանս Հայ-Ռուսական համալսարանում և Ցյուրիխի համալսարանում։

Նշենք նաև, որ Ժնևի համալսարանը Շվեյցարիայի ակադեմիական հաստատություններից և իրենց հետ համատեղ ծրագիր ներկայացրած 7 երկրներից ստացել էր 31 հայտ, որից ֆինանսավորում է ստացել միայն մեկ երրորդը։

Վերոնշյալ դրամաշնորհային ծրագիրը նախատեսված է Շվեյցարիայի և մի շարք պետությունների՝ Հայաստանի, Ռուսաստանի Դաշնության, Ադրբեջանի, Բելառուսի, Վրաստանի, Ղազախստանի, Ղրղզստանի, Մոլդովայի, Մոնղոլիայի, Տաջիկստանի, Թուրքմենստանի, Ուկրաինայի և Ուզբեկստանի գիտական կենտրոնների միջև նախագծերի առաջնային ֆինանսավորման համար։