Որպեսզի Փաշինյանը գնա, նախկիններն էլ չգան. ԼՀԿ-ից առաջարկում են վարչապետ ընտրել Մարուքյանին. ՏԵՍԱՆՅՈՒԹ

Վարչապետ Փաշինյանի հրաժարականի պահանջով հակակառավարական ցույցերը շարունակվում են շուրջ երկու ամիս: Ընդդիմությունը ճանապարհներ է փակում, կառավարական շենքեր շրջափակում, գիշերում Հանրապետության հրապարակում, միայն թե Նիկոլ Փաշինյանը գնա: Ի պատասխան՝ Փաշինյանը խոսում է ապագայից ու առաջիկա անելիքներից: Արդյունքում իշխանության և ընդդիմության՝ երկխոսելու հավանականությունը փակուղում է հայտնվել:

Ընդդիմության և իշխանության տեսակետները համընկնում են միայն մի կետում՝ միմյանց հետ խոսելու բան չունեն: Սեղանի շուրջ նստելու՝ ընդդիմության միակ օրակարգը բացակայում է իշխանության օրակարգից:

Հայրենիքի փրկության շարժման բողոքի ակցիաներն աչքի չեն ընկնում բազմամարդությամբ: Շարժմանը միացած ԲՀԿ փոխնախագահ Միքայել Մելքումյանն ասում է՝ պարտադիր չէ, որ հարյուր հազար մարդ դուրս գա փողոց:

Ընդդիմության ներկայացուցիչն ասում է՝ անհավանական բան է եղել․ Հանրապետության նախագահը, Կաթողիկոսները, մտավորականները, որոնք իշխանության հրաժարականի պահանջին սովորաբար միանում էին վերջին պահին, այս անգամ առաջիններից էին: Մելքումյանը վստահ է․ իր ձևակերպմամբ՝ Արցախը հանձնած ղեկավարը գնալու է, եթե անգամ հրապարակում կանգնած մարդկանց թիվը նվազում է:

Իշխանության ներկայացուցիչ Վահագն Հովակիմյանն էլ շարունակում է Փաշինյանի գծի մեջ մեկնաբանել՝ տեղի ունեցողը հեղաշրջում է, նախկիններն ուզում են վերադառնալ, բայց ժողովուրդը, Հովակիմյանի ձևակերպմամբ, թալանչիներին ու կոռուպցիոներներին չի ցանկանում իշխանության տեսնել:

Հովակիմյանը վստահեցնում է, որ քաղաքացիներին կընձեռվի հնարավորություն՝ որոշել, թե ով է լինելու իշխանության: Սակայն պատասխան չունի հարցին, թե երբ կլինեն արտահերթ ընտրությունները: Նշում է միայն, որ անցումային շրջանի վարչապետ Վազգեն Մանուկյանը չի կարող լինել:

Ազգային ժողովրդի «Լուսավոր Հայաստան» խմբակցությունից Գևորգ Գորգիսյանն էլ երկիրն այս վիճակից հանելու մեկ տարբերակ է տեսնում:

Գորգիսյանը հույս է հայտնում, որ իրավապահները կզբաղվեն Փաշինյանի գործողություններով, կհեռացնեն նրան՝ այդպիսով լուծելով ազգային անվտանգության խնդիրը:

Գորգիսյանը տեղեկություններ ունի, որ Փաշինյանին իշխանության ղեկին ցանկանում է տեսնել քաղաքացիների 15 տոկոսը, այն էլ՝ նախկինների վերադարձի վախով պայմանավորված: ԼՀԿ-ական պատգամավորն ասում է՝ եթե ուզում եք Փաշինյանը հեռանա, բայց նախկիններն էլ չգան, մեկ ելք կա՝ վարչապետ ընտրել Էդմոն Մարուքյանին:

Գևորգ Գորգիսյանը վստահ է՝ եթե Մարուքյանին առաջադրելու պահը գա, ապա պատգամավորների մեծամասնությունը նրան կընտրի:

Մանրամասները՝ տեսանյութում։

Նարեկ Կիրակոսյան