15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ցուցում էինք ստացել՝ զբաղեցնել շահավետ դիրքեր՝ ՀՀ-ի սահմաններին, թե դրանից դուրս․ Կապանի քաղաքապետ. ՏԵՍԱՆՅՈՒԹ
Քաղաքականություն
25.12.2020 | 14:36
Արցախի դեմ Ադրբեջանի սանձազերծած պատերազմին ակտիվ մասնակցություն են ունեցել նաև սյունեցիները, կրել անդառնալի կորուստներ՝ ինչպես Արցախում, այնպես էլ Սյունիքի մարզի բնակավայրերի պաշտպանության ընթացքում: Այս մասին ԱԺ «Բարգավաճ Հայաստան» խմբակցության կազմակերպած աշխատանքային քննարկման ժամանակ ասաց Կապանի քաղաքապետ Գևորգ Փարսյանը:
Նա նշեց, որ հոկտեմբերի 18-ին վարչապետ Նիկոլ Փաշինյանը Գորիսում հրավիրել էր խորհրդակցություն համայնքների ղեկավարների մասնակցությամբ՝ առաջարկելով անցնել ինքնապաշտպանության, Սյունիքի մարզի ինքապաշտպանական մարտերի համակարգող նշանակվել էր Արտակ Դավթյանը:
«Գեներալ Դավթյանից ցուցում ստացանք զբաղեցնել մեզ համար շահավետ դիրքեր թե՛ ՀՀ սահմաններին, թե՛ դրանից դուրս: Մենք ընտրեցինք այն բնագիծը, որը հեռու էր մեր բնակավայրերից՝ այդպիսով անվտանգության գոտի ապահովելով: Թեժ մարտեր ընթացան Կապանում, մասնավորապես՝ Դավիթ Բեկի, Ուժանիսի, Կենտրոնական և Ներքին Հանդի հատվածներում, եղան զոհեր, բայց մի մետր անգամ հետ չնահանջեցինք՝ պահպանելով այդ բնագծերը: Նոյեմբերի 9-ի հայտարարությունից հետո մենք շարունակեցինք կանգնած մնալ մեր զբաղեցրած դիրքերում՝ ապահովելով բնակավայրերի անվտանգությունը:
Դեկտեմբերի 17-ին հրաման իջեցվեց ՊՆ-ի կողմից թողնել բնագծերը, դիրքերը և հետ գալ ՀՀ սահմանների վրա: Կապանցիների համար դա լուրջ խնդիրներ է առաջացրել: Այս մասին ԱԺ «Բարգավաճ Հայաստան» խմբակցության կազմակերպած աշխատանքային քննարկման ժամանակ ասաց Կապանի քաղաքապետ Գևորգ Փարսյանը:
Փարսյանի խոսքով՝ այսօրվա դրությամբ՝ թշնամին Սյունիք բնակավայրի բնակելի հատվածից գտնվում է 100 մետր, Կապանից՝ 1 կմ հեռավորության վրա, և այդ բնագծերը զիջելով՝ Կապան քաղաքը և մի շարք բնակավայրեր դարձել են թիրախ թշնամու համար:
Կապանի քաղաքապետն ասաց, որ կան խնդիրներ նաև ճանապարհների անվտանգության հետ կապված, մասնավորապես՝ Կապան-Գորիս, Կապան-Ճակատեն, Կապան-Ագարակ հատվածների: «Կապան-Գորիսը և Կապան-Ճակատենը գործում են, իսկ Կապան-Ագարակը ստիպված ենք եղել չօգտագործել, քանի որ անցել է թշնամու վերահսկողության ներքո, և դեռևս որևէ կարգավորում չկա: Կա, իհարկե, այլընտրանքային ճանապարհ, որը, սակայն, հիմնանորոգման կարիք ունի և մի քանի անգամ երկար է, իսկ ձմռան ամիսներին նույնիսկ անանցանելի է դառնում: Այսինքն՝ Ագարակի, Եղվարդի և Ուջանի գյուղացիները որոշ առումով շրջափակման մեջ են հայտնվել»,- պարզաբանեց Փարսյանը:
Փարսյանը վստահեցրեց, որ Կապանի բնակչության մոտ խուճապ չկա, սակայն առկա է անհանգստություն և լարվածություն: «Չեն պատկերացնում՝ ինչ է սպասվում: Ինձ անընդհատ հարցնում են ապագայի մասին, ես չունեմ այդ հարցի պատասխանը, բայց հավատացած եմ, որ ամեն ինչ պետք է անել՝ ապահովելու մեր բնակչության անվտանգությունը»,- նշեց Կապանի քաղաքապետը:
Մանրամասները՝ տեսանյութում:
