30.06.2026 | 21:08
Բաքվի դատարանում հայ գերիները հայտարարել են, որ իրենց մեղավոր չեն ճանաչում. փաստաբանները խնդրել են արդարացնել
Ճապոնիան բողոքի նոտա է հղել Հարավային Կորեային՝ վիճելի կղզիների մոտ զորավարժություններ անցկացնելու համար
Քաղաքականություն
25.12.2020 | 16:42
Ճապոնիայի կառավարությունը բողոքի նոտա է հղել Հարավային Կորենային՝ Ճապոնական ծովում՝ Տակեշիմա կղզու մոտակայքում, որին հավակնում է Տոկիոն, զորավարժություններ անցկացնելու համար։ Այս մասին այսօր տեղի ունեցած մամլո ասուլիսի ժամանակ հայտնել է նախարարների կաբինետի գլխավոր քարտուղար Կացունոբու Կատոն, գրում է ՏԱՍՍ-ը։
«Տակեշիմա կղզիները Ճապոնիայի վաղեմի տարածքն են՝ ինչպես պատմականորեն, այնպես էլ միջազգային իրավունքի տեսանկյունից: Մենք անընդունելի ենք համարում նման գործողությունները, որոնց կապակցությամբ բողոք է հղվել հարավկորեական կողմին»,- ասել է նա:
Yonhap գործակալությունն այսօր ավելի վաղ հայտնել էր, որ զորավարժություններն անցկացվել են դեկտեմբերի 4-ին՝ Կորեայի Հանրապետության ռազմածովային ուժերի և առափնյա պահպանության ծառայության մասնակցությամբ: Նշվում է, որ զորավարժությունների մասշտաբները կրճատվել են՝ կորոնավիրուսային համաճարակի պատճառով:
Հավելենք, որ Ճապոնական ծովում գտնվող Տակեշիմա կղզիները վեճի առարկա են դարձել Տոկիոյի և Սեուլի միջև: Ճապոնիան պնդում է, որ Հարավային Կորեան ապօրինի կերպով օկուպացրել է այդ տարածքները, որոնք ընդգրկվել են Ճապոնական կայսրության կազմում 1905 թվականին: Հարավային Կորեայի իշխանությունները, ինչպես և ԿԺԴՀ ղեկավարությունը, պնդում են, որ այս փոքրիկ արշիպելագը միշտ եղել է կորեական պետության մաս: Այժմ կղզիները վերահսկվում են հարավկորեական բանակի կողմից։
Տաթև Ֆռանգյան
