15.12.2024 | 17:40
Հրշեջները մարել են Արշակունյաց պողոտայի հյուրանոցներից մեկում բռնկված հրդեհը
Գերմանիան մերժել է Թուրքիային․ ընդդիմադիր լրագրողը չի արտահանձնվի
Քաղաքականություն
25.12.2020 | 14:15
Թուրքիան Գերմանիայից պահանջել է արտահանձնել ընդդիմադիր Cumhuriyet թերթի նախկին գլխավոր խմբագիր Ջան Դյունդարին, որը Ստամբուլի դատարանի կողմից դատապարտվել էր 27 տարի և 6 ամիս ժամկետով ազատազրկման։ Սակայն Գերմանիայի իշխանություններն անմիջապես մերժել են Թուրքիայի պահանջը, գրում է թուրքական Sabah պարբերականը։
«Դյունդարը դատապարտվել է լրտեսության և ահաբեկչական կազմակերպությանն օժանդակելու մեղադրանքով: Նրան լրագրող անվանելը, իսկ նրա պատիժը՝ խոսքի ազատության ոտնահարում, վիրավորանք է իրական լրագրողների համար: Նրա հանցագործությունները հավանության արժանացնելու փոխարեն, մեր գործընկերները պետք է անմիջապես արտահանձնեն նրան Թուրքիային»,- Twitter-ի իր պաշտոնական միկրոբլոգում գրել է Թուրքիայի նախագահի հասարակայնության հետ կապերի տնօրեն Ֆահրեթին Ալթընը ՝ տարածելով գերմաներեն, անգլերեն և թուրքերեն լեզուներով գրառումը:
Գերմանիայի արտգործնախարարությունն անմիջապես արձագանքել է Թուրքիայի պահանջին։ Deutsche Welle Turkish-ի հետ զրույցում գերատեսչությունից պարզաբանել են, որ Գերմանիան չի արտահանձնի քաղաքական դատապարտյալներին ու մատնանշել մամուլի, խոսքի ազատության կարևորությունը։
Հիշեցնենք՝ Ջան Դյունդարի դեմ քրեական գործ է հարուցվել այն բանից հետո, երբ 2015 թվականին ընդդիմադիր Cumhuriyet թերթը , որի գլխավոր խմբագիրն էր Դյունդարը, հրապարակել է գաղտնի տեղեկություն, որը հաստատում էր, որ Թուրքիայի կառավարությունը զենք է մատակարարում Սիրիայի ապստամբներին։
Տաթև Ֆռանգյան
