Վարչապետի հրամանն օրենք չէ. ՀՀ փոխոստիկանապետ․ ՏԵՍԱՆՅՈՒԹ

Ոստիկանների՝ ժողովրդին մեջքով շրջվելը որևէ վերաբերմունք չի արտահայտում, գուցե, տակտիկական քայլ է եղել: Այս մասին կառավարությունում լրագրողների հետ զրույցումասաց ՀՀ փոխոստիկանապետ Արա Ֆիդանյանը։

Անդրադառնալով ոստիկանության աշխատակիցների հրաժարականի դիմումներին՝ նա նշեց, թե շատերը անձնական խնդիրներից ելնելով են հրաժարականի դիմում ներկայացնում, իսկ թե ինչ խնդիր, փոխոստիկանապետը հրաժարվեց ներկայացնել։

«Քաղաքական դիրքորոշման պատճառով ոստիկանությունից գրեթե ազատման դեպքեր չեն եղել», – ասաց Ֆիդանյանը՝ հավելելով, որ ոստիկանությունը ապաքաղաքական կառույց է:

«Մենք կատարում ենք օրենքով մեզ վերապահված գործառույթները»,- ասաց Ֆիդանյանը՝ պատասխանելով հարցին, թե արդյոք կկատարեն հրամանը, եթե վարչապետը ասի, թե ուզում է «արյան գետեր տեսնել»։

«Վարչապետի հրամանը օրենք չէ», – ընդգծեց փոխոստիկանապետը։

Արա Ֆիդանյանը նաև նշեց, որ ինքն այլ պաշտոն էր զբաղեցնում, և վարչապետն ասել է, թե չի ասել, որ ուզում է արյան գետեր տեսնել, եղել է նման հրաման, թե չի եղել, պետք է հարցնել այն անձանց, ովքեր ներկա են եղել: Ֆիդանյանը հավելեց, որ իր պաշտոնավարման ընթացքում նման հրաման չի եղել:

Հիշեցնենք, որ ԱԱԾ նախկին տնօրեն Արթուր Վանեցյանն էր ժամանակ առաջ հայտարարել, թե նախորդ տարի Իջևանի դեպքերի ժամանակ Նիկոլ Փաշինյանն իրեն ու այն ժամանակվա ոստիկանապետ Վալերի Օսիկյանին ասել էր, թե ուզում է Իջևանում «արյան գետեր տեսնել»:

Մանրամասները՝ տեսանյութում: