Ինչո՞ւ թվեր չեք ներկայացնում. Թունյանը՝ առողջապահության փոխնախարարին. ՏԵՍԱՆՅՈՒԹ

ՀՀ ազգային ժողովի «Իմ քայլը» խմբակցության մի քանի պատգամավորներ առաջարկում են Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին օրենքի նախագծով սահմանված երեք դրույթների ուժի մեջ մտնելու ժամկետը երկարաձգել մեկ տարով՝ սահմանելով 2022 թվականի հունվարի 1-ը: Փոփոխությունների նախագծերի փաթեթը տնտեսական հարցերի մշտական հանձնաժողովի նիստում ներկայացրեց համահեղինակ Բաբկեն Թունյանը:

Նրա խոսքով՝ ծխախոտի տարածվածության վրա դրանց ազդեցությունը խիստ կասկածելի է. կասկածելի է, թե դա քանի տոկոսով էր կրճատելու ծխողների թիվը, սակայն մարդկանց, տնտեսավարողների եկամուտների վրա ազդեցությունը խիստ էական է:

Առողջապահության փոխնախարար Լենա Նանուշյանը, սակայն, հակադարձեց, ասելով, որ կառավարության դիրքորոշումն այն է, որ եթե այդ կետերն ուժի մեջ մտնեն հունվարի 1-ից, որևէ տնտեսական ազդեցություն չեն ունենա, համավարակի պարագայում շատ ավելի կարևոր է, որ օրենքի բոլոր դրույթները գործեն:

«Այս ամիսները ևս մեկ անգամ մեզ ապացուցեցին, որ մենք ճիշտ ճանապարհի վրա ենք: Այսօր կորոնավիրուսային հիվանդությունից մահանում են հենց այն մարդիկ, որոնք ոչ վարակիչ հիվանդություններ ունեն: Ոչ վարակիչ հիվանդությունների հիմնական ռիսկի ֆակտորը հանդիսանում է ծխախոտի օգտագործումը: Եվ կարծում եմ, որ մենք պետք է մեր ուժերը համատեղ ներդնենք, որ ուժեղացնենք այս օրենքի բոլոր դրույթների կիրարկումը»,- նշեց Նանուշյանը:

«Մենք ունենք հաշվարկ, թե ծխախոտի հրապարակային ցուցադրությունը ինչքանով բացասաբար կազդի տնտեսության վրա»,- նշեց Նանուշյանը:

Բաբկեն Թունյանը դիմելով առողջապահության փոխնախարարին՝ ասաց. «Ինչո՞ւ թվեր չեք ներկայացնում: Այդ թվերը այսօր ներկայացնելո՞ւ եք, թե՞ ոչ»: Փոխնախարարը խոստացավ ներկայացնել:

Մանրամասները՝ տեսանյւոթում: