11.10.2026 | 23:33
Հակոբ Շարբաթյանը՝ բռնցքամարտի Եվրոպայի Մ-17 չեմպիոն. ՏԵՍԱՆՅՈՒԹ
ԼՂ հակամարտությունը թունավորում էր ԱՊՀ-ում համագործակցության մթնոլորտը․ Ղազախստանի նախագահ
Քաղաքականություն
18.12.2020 | 19:23
Ղազախստանի նախագահ Կասիմ-Ժոմարտ Տոկաևը դեկտեմբերի 18-ին ԱՊՀ երկրների ղեկավարների առցանց հանդիպման շրջանակում ողջունել է Լեռնային Ղարաբաղում մարտական գործողությունների դադարեցման մասին հայտարարությունը՝ նշելով, որ այդ տարածաշրջանում հակամարտությունը «թունավորում էր ԱՊՀ-ում համագործակցության մթնոլորտը», գրում է EurAsia Daily։
Ղազախստանի ղեկավարը նոյեմբերի 9-ին Ղարաբաղի շուրջ ձեռք բերված հայտարարությունն անվանել է «պատմական» ու հույս հայտնել, որ այն կնպաստի տարածաշրջանում հարատև խաղաղության հաստատմանը։
«Ըստ էության՝ մարվել է հետխորհրդային տարածքում հակամարտության օջախը, որը թունավորել է ԱՊՀ քաղաքական մթնոլորտը նրա գոյության ողջ ընթացքում»,- ասել է Ղազախստանի ղեկավարը՝ հավելելով, որ Լեռնային Ղարաբաղի վերաբերյալ հայտարարությունը «ներկայիս ճգնաժամային իրավիճակում միակ ճիշտ որոշումն էր»:
Ըստ նրա՝ այս բարդ ժամանակաշրջանում առանձնակի կարևորություն է ստանում ԱՊՀ անդամ պետությունների միջև սերտ համագործակցությունը։
«Սակայն կարևորն այն է, որ մեր երկրների ժողովուրդները ցանկանում են ապրել խաղաղ միջավայրում, ընկերություն անել միմյանց հետ»,- հայտարարել է Տոկաևը։
Տաթև Ֆռանգյան
