ԵՐԵՎԱՆԻ ԺԱՄԱՆԱԿՈՎ․ Քաղաքաշինական առումով զարգացում ապրելու համար կիրթ ազգ է պետք. մենք դեռ տգետ ենք. Լևոն Վարդանյան

«Այսօրվա պատվիրատուների 90 տոկոսը չի հասկանում՝ ինչ է նշանակում հանրային շահ, և ինչ՝ մասնավոր շահ, նրանց թվում է՝ ռեստորանում են, որտեղ ով վճարում է՝ նա էլ պատվիրում է երաժշտությունը»,- Factor TV-ի «Երևանի ժամանակով» զրուցաշարի շրջանակում նման կարծիք հայտնեց ճարտարապետ, «Հին Երևան» նախագծի հեղինակ  Լևոն Վարդանյանը։ Նրա խոսքով՝ ճարտարապետությանն առնչվող ամեն հարց դիտարկվում է մասնավորի՝  բիզնես տեսանկյունից։

Ինչ վերաբերում է  «Հին Երևան» նախագծին,  մեր այն  դիտարկմանը, թե որքան էլ նախագծի շրջանակում վերականգնվեն պատմական շենքերը, միևնույն է, համապատասխան միջավայրը կորցնելու ենք, ճարտարապետը պնդեց, որ պահպանված շենքերը նույնպես կորցրել են իրենց միջավայրը. «Այսօր թամանյանական շենքերին ձեղնահարկեր են ավելացվում, սա աբսուրդ է… Մենք վաղուց սկսել ենք հոշոտել թամանյանական շենքերը»։

Անդրադառնալով երևանյան դիմագիծը կորցնելու հանգամանքին, մենք զրուցեցինք արդեն կորսված Երիտասարդական պալատի (Կուկուռուզնիկ), «Ռոսիա» կինոթատրոնի, «Զվարթնոց» օդանավակայանի հին շենքի մասին։ Լևոն Վարդանյանի համոզմամբ՝ խորհրդային մոդեռնիզմի այս նմուշները Երևանի դեմքը լինել, դրա միջավայրի մի մասը կազմել չեն կարող։  Հարցին, թե ցավալի չէ արդյոք, որ «Զվարթնոցն» այսօր քանդման վտանգի  տակ է, ճարտարապետը պատասխանեց. «Ով «Զվարթնոցով» շատ մտահոգված է, թող գնա՝ պայքարի»։

Factor TV-ն հետաքրքրվեց՝ ճարտարապետը մտավախություն չունի արդյոք ընկալվելու որպես իշխանամետ մտավորական. «Ես ոչ ոքից չեմ վախենում՝ ո՛չ իշխանություններից, ո՛չ ժողովրդից, ես պատասխանատու եմ իմ կառույցների համար»։

Աննա Բաբաջանյան