«Հիվանդ երեխան, եթե ցավերի մեջ է, ո՞նց պիտի հսկի առաջնագիծը»․ զինվորի հայրն ահազանգում է՝ տղան ունի «Երևանյան հիվանդություն», բայց զորակոչվել է ծառայության

Արցախում ծառայություն իրականացնող 1999 թվականին ծնված Նարեկ Սարգսյանի հայրն ահազանգում է՝ որդին տառապում է «Երևանյան հիվանդությամբ», սակայն նրան զորակոչել են ծառայության։ Իսկ երբ խնդրի մասին Երևանի «Արաբկիր» վարչական տարածքի զինվորական կոմիսարիատում փորձել են բարձրաձայնել, տղայի մորը դուրս են հրավիրել։

Նարեկ Սարգսյանի հայրը՝ Նորայր Սարգսյանը, Factor.am-ին պատմեց, որ արդեն գրեթե վեց ամիս ծառայող որդին այդ ընթացքում մի քանի անգամ ուշագնաց է եղել, պարբերաբար հայտնվել տարբեր հոսպիտալներում։ Զինվորի հորը վախեցնում է այն հանգամանքը, որ որդուն պատրաստվում են ուղարկել առաջնագիծ, նա հարց է հնչեցնում՝ աոռղջական խնդիրներով տղան ինչպե՞ս է հսկելու սահմանը:

«Ինքը հենց այն վաշտում է, որտեղից առաջնագիծ պիտի ուղարկեն։ Հիվանդ երեխան, եթե ցավերի մեջ է, ո՞նց պիտի հսկի առաջնագիծը։ Խոնավ պայմաններում իր վիճակն ավելի է վատանալու»,- մտահոգվում է զինվորի հայրը։

Նա նամակով դիմել է Պաշտպանության նախարարությանը, նրա նամակը, սակայն, մնացել է անարձագանք: Ավելի ուշ Նորայր Սարգսյանին ընդունել է ՊՆ ներկայացուցիչը, վերջինս օրեր անց զանգահարել է զինվորի հորն ու ասել, որ իր որդին պիտանի է զինծառայության։

Խնդրի մասին տեղեկացրինք Հայաստանի պաշտպանության նախարարի մամուլի խոսնակ Արծրուն Հովհաննիսյանին։ Վերջինս նշեց, որ գոյություն ունեն բողոքարկման տարբեր ձևեր և ծնողներին հորդորեց դիմել ՊՆ թեժ գիծ՝ 1-28 հեռախոսահամարով։

Լիլիթ Շաբոյան