Առաջիկա կես տարում արտահերթ ընտրություններ չեն լինի. Լենա Նազարյան․ ՏԵՍԱՆՅՈՒԹ

Վարչապետի հրաժարականը պահանջողները հեղաշրջման փորձ են ծրագրում: Դա տեղի չի ունենա ոչ մի դեպքում, անհնար է: Այս մասին Factot TV-ի հետ զրույցում ասաց ԱԺ փոխնախագահ Լենա Նազարյանը:

«Ինչո՞ւ եմ այդպես մտածում: Անցումային կառավարության թեկնածուն առաջարկում է իրեն ընտրել և մեկ տարվա ընթացքում չեն բացառում ընտրակեղծարարության համակարգի վերագործարկումը՝ իր միջոցով։ Ես դիտեցի Վազգեն Մանուկյանի հարցազրույցներից մեկը, որտեղ նա ասում է՝ դե չգիտեմ, ժողովուրդը կգնա ընտրակաշառք վերցնելու գայթակղությանը, թե՝ ոչ: Այսինքն՝ թույլ է տալիս մտածելու, որ ժողովրդին կտանեն փորձության, ընտրակաշառք կբաժանեն և կտեսնենք՝ ժողովուրդը կգնա՞ գայթակղության, թե՞ չի գնա: Անընդունելի է նման խոսք ասելը: Իր հետևում կանգնած են այնպիսի կուսկացություններ՝ ՀՀԿ-ն, ԲՀԿ-ն, ՀՅԴ-ն, որոնց ընտրությունների կազմակերպման վերաբերյալ Հայաստանում շատ հստակ համոզմունք կա: Պարզ է, որ նրանց նպատակն է՝ Վազգեն Մանուկյանի միջոցով վերականգնել ընտրակեղծարարության համակարգը: Իմ հոգսը չէ՝ փրկել Վազգեն Մանուկյանին ակնհայտ գահավիժումից, բայց իմ հոգսն է՝ լինել ազատ ընտրությունների երաշխավորը: Վարչապետի հրաժարական նոր վարչապետի ընտրության պայմանով չի լինի»,- նշեց նա:

Հարցին՝ ի՞նչ պայմանով կարող է լինել վարչապետի հրաժարական, Լենա Նազարյանն ասաց. «Մենք կարող ենք խոսել արտահերթ ընտրությունների մասին, սակայն դրա մասին արժի խոսել միայն ճանապարհային քարտեզում ամփոփված անելիքների իրագործման և հաշվետվության փուլից հետո»:

Հստակեցնող հարցին՝ այսինքն՝ արտահերթ ընտրություններ կլինեն Փաշինյանի ներկայացրած ճանապարհային քարտեզի կետերն իրանացնելուց հետո՞ միայն, Լենա Նազարյանը պատասխանեց. «Ես ասացի, որ առաջիկա ապագան այդ քարտեզի անելիքներն են, ես դեռ չեմ տեսնում, թե դրանից հետո ինչ կլինի»:

Հետաքրքրվեցինք՝ այսինքն առաջիկա կես տարում արտահերթ ընտրություններ չե՞ն լինի, ինչին ԱԺ փոխխոսնակը պատասխանեց. «Ես կարծում եմ, որ ոչ»:
Հարցազրույցն ամբողջությամբ՝ տեսանյութում։

Նարեկ Կիրակոսյան