Հասարակություն
15.01.2018 | 12:31
«Բժիշկների ցուցւմից հետո ՔԿՎ չթույլատրեց, որ Եղնուկյանին հոգեբան այցելի, մենք խնդրով դիմեցինք դատարան, վերջինս թույլատրեց, սակայն ՔԿՎ-ն կրկին մերժեց։ Նրանք ասում են, որ դատարանն ընդունել է հակաօրինական որոշում, այս մարմինն իր լիազորությունները կատարելու փոխարեն զբաղված է օրենք մեկնաբանելով»,- Factor.am-ի հետ զրույցում նշեց «Սասնա ծռեր»-ին օժանդակելու մեջ մեղադրվող Կարո Եղնուկյանի պաշտպան Տիգրան Հայրապետյանը:
Փաստաբանը շեշտեց՝ արդեն քանի ամիս է, ինչ Կարո Եղնուկյանը գալիս է դատարան և մնում նկուղում․ «Նա չի կարող մասնակցել նիստերին, քանի որ նիստերի դահլիճ մտնելուն պես նրա առողջական վիճակը կտրուկ վատանում է և սկսում է կյանքին վտանգ սպառնալ։ Բժիշկներն ախտորոշել են «կրիզիսային էպիզոդիկ հիպերտոնիա. կրիզիսային, քանի որ վիճակը կարող է կտրուկ վատանալ, և էպիզոդային, որը նշանակում է՝ կախված իրավիճակներից։ Եղնուկյանը նշում է՝ ամեն անգամ, երբ պիտի մասնակցի իրեն չվերաբերող նիստի, տեսնի այդ անարդարությունները, վիճակը սկսում է վատանալ։ Նրա ճնշումը 130/90-ն է, սակայն նիստերի դահլիճ բերելու հետևանքով հասել էր անգամ 260-ի»- նշեց փաստաբանը։
Տիգրան Հայրապետյանն ընդգծեց, որ խնդրի կապակցությամբ դիմել են բոլոր իրավասու կառույցներին, սակայն պատշաճ արձագանք չեն ստացել։
Լիլիթ Շաբոյան
