Մեզ պետք է նոր բյուջեի նախագիծ․ «Լուսավոր Հայաստանը» դեմ կքվեարկի բյուջեի նախագծին. ՏԵՍԱՆՅՈՒԹ

ՀՀ ազգային ժողովի «Լուսավոր Հայաստան» խմբակցությունը դեմ է 2021թվականի բյուջեի մասին օրենքի ներկայացված նախագծին, խմբակցության պատգամավոր Արկադի Խաչատրյանն այն համարում է իներցիոն՝ ներկայիս մարտահրավերներին և իրավիճակին չհամապատասխանող:

«2021-ի պետբյուջեի նախագիծը, որը մշակվել էր դեռ մինչև պատերազմի սկսվելը, նույնիսկ մակրոտնտեսական ցուցանիշների վերանայման պայմաններում չի համապատասխանում ներկայիս իրողություններին և մարտահրավերներին»,- ԱԺ-ում 2021 թվականի պետական բյուջեի մասին օրենքի նախագծի քննարկման ժամանակ ասաց Արկադի Խաչատրյանը:

Նա ներկայացրեց, թե որոնք են իր մատնանշած իրողությունները: «Հուսալքությունն ու հուսահատությունը, տնտեսական հսկա անորոշություններն իրենց արտացոլումն են գտնում քաղաքացիների, տնտեսավարող սուբյեկտների վարքագծի, տնտեսական որոշումների վրա: Հետևաբար առանց ներդրումների և կապիտալ ծախսերի կատարման անկարողության պայմաններում մենք չենք կարող խոսել արդյունաբերության և տնտեսության արդիականացման մասին: Պատերազմն իր արտացոլումը գտավ և իր ազդեցությունը թողեց նաև մեր դեմոգրաֆիկ վիճակի վրա: Ցավոք, տիրող հոգեբանական վիճակը և սպասումները, տնտեսական անորոշությունները հիմք են հանդիսանում՝ ենթադրելու, որ եթե այս պայմաններում շատ արագ չկարողանանք կարգավորել վիճակը, դա կարող է բերել նաև արտագաղթի»,- ասաց պատգամավորը:

Խաչատրյանի կարծիքով՝ եթե շատ արագ չկարգավորվի քաղաքական կայունությունը արագ վերականգնում ակնկալել չի լինի:  Ըստ նրա՝ կապիտալ ծախսերի կատարողականի ավելացումը, ծախսերի արդյունավետության բարձրացումը խիստ անհրաժեշտ միջոցառումներ են, պետք է վերանայվի նաև ծախսերի կառուցվածքը: «2021-ի բյուջեի նախագիծը դիտարկում եմ որպես իներցիոն՝ ներկայիս մարտահրավերներին և իրավիճակին չհամապատասխանող: Մեզ պետք է նոր բյուջե: Եվ ես կարծում եմ, որ անցումային կառավարությունը նոր ռազմավարությունը մշակելուց հետո պետք է ներկայացնի պետբյուջեի նոր նախագիծ»,- ասաց Խաչատրյանը:

Մանրամասները՝ տեսանյութում: