08.10.2026 | 13:00
Բենզինի պահեստում պայթյունի ժամանակ զոհվածներից 70-ը եղել են ԱԱԾ, ՆԳՆ աշխատակիցներ և ՊՆ ծառայողներ․ ՏԵՍԱՆՅՈՒԹ
Էրդողանն արդեն ներկայացնում է, թե Մեղրիում ինչ տիպի ճանապարհ է լինելու. թուրքագետ
Քաղաքականություն
07.12.2020 | 13:16
«Լուսավոր Հայաստան» խմբակցության նախաձեռնությամբ հրավիրված` երկրում ստեղծված իրավիճակի վերաբերյալ խորհրդարանական լսումների ժամանակ ԵՊՀ արևելագիտության ֆակուլտետի դեկան Ռուբեն Մելքոնյանն անդրադարձավ սպառնալիքներին ու անելիքներին։
«Փորձում եմ ներկայացնել երեք սպառնալիք և երեք անելիք։ Առաջինը, իմ կարծիքով՝ թուրք-ադրբեջանական սպառնալիքը վաղուց արդեն դարձել է շատ իրական, և մենք վաղուց պետք է պատրաստվեինք ոչ միայն ադրբեջանական, այլ հենց թուրք-ադրբեջանական սպառնալիքներին։
Երկրորդ, թուրք-ադրբեջանական նկրտումների շարունակականություն ու աճ, դրա տարբեր դրսևորումներ մենք տեսնում ենք։ Դրանցից է Մեղրիի խնդիրը, որը հայտնի պանթուրանական ծրագրի մեխն է։ Եվ այսօր մեզ մոտ այդ խնդիրն այնքան չի քննարկվում, ինչքան Թուրքիայում։ Եվ արդեն նույնիսկ Էրդողանը ներկայացնում է ճանապարհը, թե ինչպես է անցնելու Մեղրիով, ինչ ոճի ճանապարհ է լինելու և այլն։ Եվ այս ամենն ակնհայտ ցույց է տալիս թուրքական նկրտումների ծրագրված, մշակված լինելը։ Բացի դրանից, ֆինանսականից մինչև կրոնական տարբեր սպառնալիքներ, վկան երեկվա Դադիվանքի դեպքն է, երբ «ուդի» հոգևորական կա այնտեղ:
Հաջորդ սպառնալիքն այն է, որ Թուրքիան կարող է հայտարարել Հայաստանի հետ սահմանները բացելու պատրաստակամության մասին։ Ի՞նչ պետք է անի Հայաստանը, և արդյոք կա՞ որևէ ծրագիր նման սպառնալիքին պատրաստ լինելու համար։
Ուզում եմ նշել, որ այդ նախապայմանը, որ Թուրքիան չէր բացում Հայաստանի հետ սահմանները, եղել է ոչ թե ֆուտբոլային դիվանագիտությունից հետո, ինչպես ասում էր Փաշինյանը, այլ եղել է 90-ականների սկզբից»,- նշեց Մելքոնյանը։
Անդրադառնալով անելիքներին՝ Մելքոնյանն ասաց, որ առաջինը մեր բոլոր ծրագրերը պետք է կառուցված լինեն իրատեսության վրա։
«Երկրորդ, միգուցե կոպիտ հնչի, բայց վերլուծական ու քաղաքական դաշտի ապատգիտացում պետք է լինի։ Դիլետանտիզմը վերջին տարիներին հոշոտել է այդ համակարգերը՝ բերելով նման հետևանքների, երբ նույն այս ամբիոնից խոսում էին լավ թուրքերի մասին և այլն։ Եվ երրորդը, շատ կոնկրետ քայլ՝ նոր մարտահրավերների գույքագրում։ Այն, ինչ հիմա մենք պետք է անենք, թուրք-ադրբեջանական նոր մարտահրավերների գույքագրումն է, առանց ինքնախաբեության և դրանց նկատմամբ մշակված ծրագրերի քննարկումն ու իրականացումը»,- նշեց Մելքոնայնը։
Մանրամասն՝ տեսանյութում:
