Նիկոլ Փաշինյանի և Արտաշես Գեղամյանի ձեռնամարտի հարցով ժամանակավոր հանձնաժողով ստեղծելու նախագծի քննարկումը հետաձգվեց

Հանրապետական խմբակցության պատգամավոր Արտաշես Գեղամյանի կողմից պատգամավորական էթիկայի կանոնները խախտելու վերաբերյալ Ազգային ժողով եզրակացություն ներկայացնելու համար ԱԺ էթիկայի ժամանակավոր հանձնաժողով ստեղծելու մասին ԱԺ որոշման նախագծի քննարկումն այսօր հետաձգվեց:

ԱԺ պետական-իրավական և մարդու իրավունքների պաշտպանության մշտական հանձնաժողովի նախագահ Հրայր Թովմասյանը հայտարարեց, որ հարցի քննարկումը հետաձգվում է հիմնական զեկուցող Արտակ Զեյնալյանի բացակայության պատճառով:

«Խնդիրը զուտ տեխնիկական էր, և երկու շաբաթ անց հարցի քննարկումը տեղի կունենա»,- Factor.am-ի հետ զրույցում պարզաբանեց ԱԺ «Ելք» խմբակցության պատգամավոր Արտակ Զեյնալյանը:

Հիշեցնենք՝ արդեն երկրորդ անգամն է, որ հարցի քննարկումը հանձնաժողովը հետաձգում է: Նախորդ անգամ քննարկումը հետաձգվեց նախագիծը լրամշակելու պատճառաբանությամբ: Նախագծով ընդդիմադիր «Ելք» խմբակցությունը պահանջում է ստեղծել էթիկայի ժամանակավոր հանձնաժողով՝ հանրապետական պատգամավոր Արտաշես Գեղամյանի պատգամավորական վարքագիծը քննարկման առարկա դարձնելու համար:

Նախագծում ասվում է, որ օրենսդիր մարմնի ներկայացուցչի՝ Արտաշես Գեղամյանի կողմից նման վարգաքագծի դրսևորումը անհամատեղելի է բարձրաստիճան պաշտոնատար անձի վարքագծի նորմերի հետ, քանի որ Ազգային ժողովի պատգամավորը պետք է հարգալից վերաբերմունք ցուցաբերի հանրության նկատմամբ, պարկեշտ և օրինակելի լինի՝ ոչ միայն պատգամավորական լիազորությունները իրականացնելիս, այլ նաև ամենօրյա կյանքում:

Հիշեցնենք՝ ԱԺ «Ելք» խմբակցության ղեկավար Նիկոլ Փաշինյանը հայտարարել էր, որ ՀՀԿ խմբակցության պատգամավոր Արտաշես Գեղամյանը 2017 հոկտեմբերի 5-ին ԱԺ միջանցքում բռունցքներով հարձակվել է իր վրա։

Շողիկ Գաստյան