Քաղաքականություն
30.11.2020 | 17:42
Գազի գնի և դրա տարանցման սակագնի ձևավորման հարցերի պայմանագրի նախագիծը պետք է մշակվի հաջորդ տարի Եվրասիական տնտեսական միության (ԵՏՄ) շրջանակում: Նոյեմբերի 30-ին այս մասին հայտարարել Է Եվրասիական տնտեսական հանձնաժողովի (ԵՏՀ) Կոլեգիայի նախագահ Միխայիլ Մյասնիկովիչը՝ ամփոփելով Բելառուսի նախագահ Ալեքսանդր Լուկաշենկոյի հետ հանդիպման արդյունքները, գրում է ԲԵԼՏԱ-ն։
«Այս հարցը դեռ առկա է ռազմավարական ուղղությունների նախագծում, կան մի քանի ուղղություններ: Մենք ունենք գազի ընդհանուր շուկայի ձևավորման ծրագիր: Դրան համապատասխան՝ 2021 թվականին պետք է մշակվի միջազգային պայմանագրի նախագիծ, որտեղ կնշվեն բոլոր մանրամասները և նրբությունները՝ գազի գնի և պոմպամղման սակագների ձևավորում»,- հայտարարել է Միխայիլ Մյասնիկովիչը:
Ըստ նրա՝ կարծիք կա, որ գազի հարցը շատ ավելի հեշտ ու հաջող կլուծվի երկկողմ հարաբերությունների շրջանակում․ օրինակ՝ Բելառուսը և Ռուսաստանը բանակցություններ կվարեն միմյանց հետ և չեն սպասի ընդհանուր շուկայի ստեղծմանը:
«Երկու խնդիրներն էլ ունեն իրենց առավելություններն ու թերությունները: Հայաստանն ու Ղրղզստանը միանշանակ կարծում են, որ Բելառուսի հետ մեկտեղ հնարավոր կլինի լուծել նաև իրենց խնդիրները՝ պոմպամղման սակագների և գազի գնի վերաբերյալ: Բայց պետք է հաշվի առնել, որ ինտեգրման մակարդակը, համագործակցությունը երկկողմ հարաբերությունների շրջանակում ունի շատ ուժեղ դիրքեր: Եվ երբեմն փոխադարձության հիման վրա ոչ բոլոր խնդիրները կարող են լուծվել հնգյակի համար, ինչ-որ բան կարելի է լուծել երկկողմ հիմքերով»,- պարզաբանել է ԵԱՏՀ-ի ղեկավարը:
Գազի ընդհանուր շուկայի ձևավորման հարցում ԵՏՄ երկրները տարբեր մոտեցումներ են ցուցաբերել։ Ռուսաստանն ու Ղազախստանն ունեն մի դիրքորոշում, Բելառուսը, Հայաստանը և Ղրղզստանը՝ մեկ այլ: Ավելին Ղրղզստանը նաև առաջարկում է կարգավորել գազի առևտուրը երրորդ երկրների հետ։ Երկիրն արդեն մասամբ գազ է գնում Ուզբեկստանից:
«Հարցը դյուրին չէ, քննարկելի է: Կարծում եմ, որ դա կդառնա դեկտեմբերի 11-ի օրակարգի գլխավոր հարցերից մեկը»,- նշել է Միխայիլ Մյասնիկովիչը:
Հիշեցնենք՝ Բելառուսի նախագահ Ալեքսանդր Լուկաշենկոն այսօր ավելի վաղ հայտարարել էր, որ պայմանավորվել են, որ վերջապես կլուծեն միասնական շուկայի ու նախևառաջ, բնական գազի շուկայի խնդիրը: Միակ հարցը, որի շուրջ համաձայնեցում չկա, գազի փոխադրման արդար սակագինն է:
Տաթև Ֆռանգյան
