06.10.2026 | 10:49
ՊԵԿ-ը քննարկել է հարկային և մաքսային բարեփոխումների հաջորդ փուլը
Հոկտեմբերին 21%-ով նվազել են անշարժ գույքի առքուվաճառքի գործարքները
Տնտեսություն
30.11.2020 | 16:09
Այս տարվա հոկտեմբերին պատերազմի հետևանքներից անմասն չի մնացել նաև անշարժ գույքի շուկան։ Հոկտեմբերին Հայաստանում գրանցվել է անշարժ գույքի առքուվաճառքի՝ 2016 թվականից ի վեր ամենացածր ցուցանիշը՝ 3․993 գործարք՝ նախորդ տարվա նույն ժամանակահատվածի 5․066-ի փոխարեն։
Այսպիսով՝ հոկտեմբերին անշարժ գույքի առքուվաճառքը, նախորդ տարվա նույն ամսվա համեմատ, նվազել է 21․2%-ով։ Այս մասին տեղեկանում ենք Կադաստրի պետական կոմիտեի հրապարակած տվյալներից։
Իսկ 2020 թվականի սեպտեմբերին գրանցվել է առքուվաճառքի 5․615 գործարք։ Այսպիսով՝ հոկտեմբերին, սեպտեմբերի համեմատ, առքուվաճառքի գործարքները նվազել են 28․9%-ով։
Հոկտեմբերի 3․993 գործարքի մեծ մասը՝ 1․389-ը (34%) գրանցվել է Երևան քաղաքում, դրան հաջորդում է Կոտայքի մարզը՝ 816 (20.4%), Արարատի մարզը՝ 421 (10.3%) գործարք։
Հոկտեմբերին Երևանում կատարված առքուվաճառքի գործարքները, նախորդ տարվա նույն ամսվա համեմատ, նվազել են 21%-ով, իսկ այս տարվա սեպտեմբերի համեմատ՝ 16.7%-ով։
Հոկտեմբեր ամսին, նախորդ տարվա նույն ամսվա նկատմամբ, նվազել է նաև վարձակալության գործարքների թիվը՝ գրանցելով 2015 թվականից ի վեր ամենացածր ցուցանիշը։ Այսպես՝ 2020 թվականի հոկտեմբերին հանրապետությունում կատարվել է վարձակալության 655 գործարք, իսկ նախորդ տարվա նույն ամսվա գործարքների թիվը 1․216 է։ Այսպիսով՝ 1 տարվա կտրվածքով հոկտեմբերին վարձակալության գործարքների թիվը նվազել է 46․1%-ով։
Անժելա Պողոսյան
