19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Բացահայտվել է Սիսիանում «Հայփոստ» ՓԲԸ-ի տեղամասից կատարված գողությունը
Հասարակություն
10.01.2018 | 18:27
ՀՀ քննչական կոմիտեի Սյունիքի մարզային քննչական վարչության Սիսիանի քննչական բաժնում քննվող քրեական գործով ձեռնարկված քննչական և դատավարական այլ գործողությունների արդյունքում բացահայտվել է «Հայփոստ» ՓԲ ընկերության Սիսիանի տեղամասից կատարված գողությունը. առաջադրվել է մեղադրանք:
Քննչական կոմիտեից մանրամասնում են, որ մի քանի օր առաջ՝ հունվարի 5-ին՝ ժամը 11:00-ին, հաղորդում է ստացվել առ այն, որ հունվարի 4-ի ժամը 18:00-ից հունվարի 5-ի ժամը 09:00-ն ընկած ժամանակահատվածում ենթադրյալ հանցագործություն կատարած անձը մուտք է գործել «Հայփոստ» ՓԲԸ Սիսիանի տեղամասի սպասարկման սրահ և հափշտակել առկա գումարը:
Դեպքի առթիվ նույն օրը հարուցվել է քրեական գործ՝ ՀՀ քրեական օրենսգրքի 177-րդ հոդվածի 2-րդ մասի 3-րդ կետով և ձեռնարկվել անհետաձգելի քննչական և օպերատիվ-որոնողական գործողություններ՝ կատարված գողության հանգամանքները պարզելու ուղղությամբ: Արդյունքում՝ փաստական տվյալներ են ձեռք բերվել առ այն, որ տեղամասից հափշտակությունը կատարել է Սիսիան քաղաքի բնակիչը՝ ծնված 1977թ., հունվարի 5-ին՝ ժամը 01:50-ի սահմաններում:
Ձեռք բերված բավարար ապացույցների հիման վրա՝ Սիսիանի բնակչին մեղադրանք է առաջադրվել՝ ՀՀ քրեական օրենսգրքի 177-րդ հոդվածի 2-րդ մասի 3-րդ կետով։ Միջնորդություն է ներկայացվել դատարան՝ նրա նկատմամբ որպես խափանման միջոց կալանավորումն ընտրելու վերաբերյալ, ինչը մերժվել է և որպես խափանման միջոց ընտրվել ստորագրություն՝ չհեռանալու մասին։
Նախաքննությունը շարունակվում է, միջոցներ են ձեռնարկվում՝ դեպքի հանգամանքների օբյեկտիվ, լրիվ և բազմակողմանի քննությունն ապահովելու ուղղությամբ:
