Քաղաքականություն
26.11.2020 | 21:35Հայաստանի արտաքին գործերի նորանշանակ նախարար Արա Այվազյանն առաջին անգամ Կառավարության նիստին մասնակցելուց հետո Factor TV-ի հետ զրույցում հայտարարեց՝ հայկական կողմը 45-օրյա պատերազմում պարտվեց, քանի որ ձախողվեց ռազմադաշտում: Հայաստանի արտաքին քաղաքական գերատեսչությունը շուրջ տասը օր ղեկավարող Արա Այվազյանը միաժամանակ նշեց՝ դիվանագիտության մեջ ձախողում չենք ունեցել:
Թե ինչո՞ւ է նոր նախարարը նման պնդումներ անում կամ այս դեպքում, եթե հայկական դիվանագիտությունը չէր ձախողել, ապա ո՞րն էր նախկին արտգործնախարար Զոհրաբ Մնացականյանի՝ պաշտոնից ազատման պատճառը, Արա Այվազյանից մեկնաբանություն ստանալ չհաջողվեց: Նա հրաժարվեց այլ հարցերի պատասխանել:
ՀՀ արտակարգ և լիազոր դեսպան Արման Նավասարդյանը Factor TV-ի հետ զրույցում ասաց՝ Արա Այվազյանը նման պատասխան է տվել՝ պարզապես ցանկանալով նախարարության հեղինակությունը պահել։ Դիվանագետը թվարկում է Արցախից տեղահանվածների վերադարձի, ռազմագերիներին հետ բերելու և դիերի որոնողական աշխատանքների խնդիրները և այս համատեքստում Արա Այվազյանի հայտարարությունը տարակուսելի է համարում: Արման Նավասարդյանը նշում է՝ 2018 թվականին քաղաքական իշխանությունների փոփոխությունից հետո Արցախյան խնդրի կարգավորման հետ կապված Հայաստանի վարչապետի մակարդակով հնչել են տարբեր հայտարարություններ, որոնք երբեմն համարվել են բանակցային գործընթացն ապակայունացնող:
Հիշեցնենք՝ 2018 թվականի մայիսի 9-ին Նիկոլ Փաշինյանը Ստեփականերտում հայտարարեց, որ ԼՂ խնդրի կարգավորման համար անհրաժեշտ է Արցախին ևս դարձնել բանակցային կողմ, իսկ 2019 թվականի սեպտեմբերի 9-ին ԱԺ-ում Արցախի նախագահ Բակո Սահակյանի և «Իմ քայլը» խմբակցության հետ հանդիպումից հետո լրագրողներին ասաց, որ բանակցում է իր սեփական կետից: Նիկոլ Փաշինյանն այս տարվա հունվարի 25-ին Կապանում հրավիրված մամուլի ասուլիսի ժամանակ էլ հայտարարեց, թե բանակցային սեղանին որևէ փաստաթուղթ չկա: Քաղաքական ղեկավարի ասածը ապրիլի 22-ին վերահաստատեց նաև ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը՝ արձագանքելով ՌԴ արտգործնախարար Սերգեյ Լավրովի հայտարարությանը, թե բանակցությունների սեղանին Լեռնային Ղարաբաղի հակամարտության փուլային կարգավորման փաստաթուղթն է:
Արման Նավասարդյանն ասում է՝ Նիկոլ Փաշինյանը փորձված չէր այդ ոլորտում, ընդունում էր որոշումներ, որոնք դիվանագիտության տեսակետից ընդունելի չէին: Հայաստանի դիվանագիտությունը, ըստ Նավասարդյանի, չկարողացավ ապահովել երկկողմ միջազգային հարաբերություններ Իրանի, Վրաստանի, Չինաստանի, ԱՄՆ-ի հետ, ինչպես նաև ձախողեց համագործակցությունը Մինսկի խմբի գործառույթների շրջանակում: Նավասարդյանը հայկական դիվանագիտության խայտառակ ձախողման էջերից է համարում նոյեմբերի 9-ին ստորագրված եռակողմ փաստաթուղթը:
Քաղաքագետ Սարո Սարոյանն էլ նշում է, որ այս պատերազմում մեր պարտության պատճառը դիվանագիտություն չունենալն է: Ըստ նրա՝ անհասկանալի է, թե ինչու է նորանշանակ նախարարը նման հայտարարություն արել:
ԱԳ նախարարի կողմից մեղադրանքները պաշտպանական ոլորտին ուղղելու ֆոնին հիշարժան է ՀՀ ԶՈՒ Գլխավոր շտաբի պետ Օնիկ Գասպարյանի՝ նոյեմբերի 17-ին հրապարակած ուղերձը, որտեղ նա նշում է, թե ԳՇ պետի պաշտոնին նշանակվելուց 4 օր անց՝ հունիսի 12-ին, ՀՀ վարչապետին, իսկ մի քանի օր անց՝ նաև Անվտանգության խորհրդին ներկայացրել է տարածաշրջանում ռազմաքաղաքական իրադրության վերլուծությունը, մեր զինուժի կարողությունները և ընդգծել, որ անհրաժեշտ է քաղաքական ու դիվանագիտական ողջ ներուժն ուղղել պատերազմից խուսափելուն կամ գոնե այն հետաձգելուն:
Մանրամասները՝ տեսանյութում:
Նարեկ Կիրակոսյան
