Ֆրանսիացի պատգամավորը՝ Արցախի անկախությունը ճանաչելու մասին․ Ավելի քան հնարավոր է

Ֆրանսիայի Սենատը մեծ հավանականությամբ կընդունի Լեռնային Ղարաբաղի անկախությունը ճանաչելու մասին բանաձևը։ Այս մասին ՌԻԱ Նովոստիին հայտնել է բանաձևի հեղինակներից «Կենտրոնամետների միության» ղեկավար Էրվե Մարսեյը։

Բանաձևի նախագիծը, որում կոչ է արվում Ֆրանսիայի կառավարությանը ճանաչել Լեռնային Ղարաբաղի Հանրապետությունն ու այն դարձնել հաստատուն կայունության հաստատման համար բանակցային գործիք, Սենատ է բերվել նոյեմբերի 18-ին։

Նախագծում սենատորները Ֆրանսիայի կառավարությանը կոչ են անում զանգվածային մարդասիրական օգնություն տրամադրել Ղարաբաղի բնակչությանը և պահանջել հումանիտար միջանցքների բացում, ինչպես նաև սկսել Ղարաբաղում կատարված պատերազմական հանցագործությունների միջազգային հետաքննություն:

Հարցին՝ որքա՞ն է հավանականությունը, որ բանաձեւը կընդունվի, Մարսեյը պատասխանել է. «Ավելի քան հնարավոր է։ Եթե նայենք բանաձևի հեղինակներին, կարող ենք ասել, որ Սենատի անդամների 70-75%-ը ստորագրել է այն»:

Նրա խոսքով՝ Սենատի գրեթե բոլոր քաղաքական ուժերը սատարում են բանաձևի նախագիծը՝ «ցանկանալով առաջին հերթին  խաղաղության վերականգնման, ապա նաև Լեռնային Ղարաբաղի ճանաչման կոչ անել»:

Մեկնաբանելով նոյեմբերի 10-ին Ղարաբաղում ռազմական գործողությունների դադարեցման մասին եռակողմ համաձայնությունը՝ ֆրանսիացի պատգամավորը դրական է գնահատել պայմանավորվածությունները և նշել այդ հարցում Ռուսաստանի կարևոր դերը:

«Այս համաձայնագիրը միանգամից վերջակետ դրեց հակամարտությանը, ինչը լավ է: Ռուսաստանը, իհարկե, կարևոր, եթե չասենք՝ հիմնարար դեր ունի այս տարածաշրջանում»,- շեշտել է խորհրդարանականը՝ հավելելով, որ համաձայնագիրն «արդեն լուծման սկիզբ է պարունակում, ուրեմն պետք է գնալ բանակցությունների այդ ճանապարհով, որոնք թույլ կտան հասնել բոլոր լուծումներին»:

Հավելենք, որ ԼՂ հարցով բանաձևի նախագիծը ներկայացվել է տարբեր խմբակցություններից հինգ սենատորների կողմից՝ Բրունո Ռետաիոյի (Հանրապետականների ​​խմբի ղեկավար), Պատրիկ Կանների, Էրվե Մարսեյի («Կենտրոնամետների միության» խմբի ղեկավար), Էլիան Ասասինի և Գիյոմ Գոթարի:

Տաթև Ֆռանգյան