14.12.2024 | 18:16
ՆԳ նախարարը Ոստիկանության անձնակազմի հետ օպերատիվ խորհրդակցություն է անցկացրել
ԱՄՆ-ը 5 մլն դոլար մարդասիրական օգնություն կհատկացնի ԼՂ-ում մարտական գործողություններից տուժածներին
Քաղաքականություն
18.11.2020 | 13:50
ԱՄՆ Կարմիր Խաչի միջազգային կոմիտեին ու միջազգային այլ կազմակերպությունների 5 միլիոն դոլար կհատկացնի՝ Լեռնային Ղարաբաղում մարտական գործողությունների հետևանքով տուժածներին օգնելու համար։ Այս մասին հայտարարել է ԱՄՆ պետքարտուղար Մայք Պոմպեոն, փոխանցում է ՌԻԱ Նովոստին։
Նշենք, որ Մայք Պոմպեոն աշխատանքային երկօրյա այցով Վրաստանում է։ Պաշտոնյայի՝ այդ երկրում ԱՄՆ դեսպանության կողմից տարածած հայտարարության մեջ ասվում է, որ Վաշինգտոնը ողջունում է Հայաստանի ու Ադրբեջանի միջև պատերազմական գործողությունների դադարեցումն ու կոչ է անում կողմերին՝ կատարել միջազգային իրավունքի պահպանման ուղղությամբ իրենց պարտավորությունները, այդ թվում՝ մարդասիրական իրավունքի ոլորտում։
«Մենք կողմերին հորդորում ենք հնարավորինս արագ համագործակցել ԵԱՀԿ Մինսկի խմբի համանախագահների հետ` հետամուտ լինելու Լեռնային Ղարաբաղի հակամարտության շարունակական և կայուն քաղաքական լուծմանը՝ հիմնված Հելսինկիի եզրափակիչ ակտի ուժի չկիրառման կամ սպառնալիքի, տարածքային ամբողջականության, ժողովուրդների ինքնորոշման և հավասար իրավունքների մասին սկզբունքների վրա: Դիվանագիտական ներգրավմանը զուգահեռ՝ Միացյալ Նահանգները տրամադրում է 5 միլիոն դոլար մարդասիրական օգնություն՝ Կարմիր Խաչի միջազգային կոմիտեի և միջազգային ու հասարակական այլ կազմակերպությունների գործընկերների գործողություններին աջակցելու նպատակով՝ վերջին մարտերից տուժած մարդկանց օգնելու համար»,- ասված է հայտարարությունում։
Տաթև Ֆռանգյան
