29.04.2024 | 15:34
Թմրանյութերի առերևույթ գովազդով զբաղվելու մեղադրանքով կալանավորվել է Երևանի 19-ամյա բնակիչ
Փաստաբանը պնդում է, ՔԿՎ-ն՝ հերքում, իսկ «Սասնա ծռեր»-ի անդամը մոտ երկու շաբաթ է՝ շարունակում է հացադուլը
Հասարակություն
29.12.2017 | 17:07
«Սասնա ծռեր» խմբավորման անդամ Արմեն Բիլյանը մոտ երկու շաբաթ է՝ ինչ հացադուլի մեջ է։ Մինչ նրա փաստաբան Արմինե Ֆանյանը հայտարարում է, որ իր պաշտպանյալն ունի առողջական լուրջ խնդիրներ, որոնք պատշաճ ուշադրության չեն արժանանում, քրեակատարողական վարչության հանրային կապերի բաժնից այդ տեղեկությունները հերքում են․ «Հրապարակվող տեղեկությունն այն մասին, որ ՀՀ «Նուբարաշեն» քրեակատարողական հիմնարկի կալանավորված անձ Արմեն Բիլյանն ունի առողջական խնդիրներ և պատշաճ բուժօգնություն չի ստանում, իրականությանը չի համապատասխանում»,- ասված է հաղորդագրության մեջ։
ՀՀ ԱՆ ՔԿՎ հանրային կապերի բաժնից տեղեկացնում են, որ Արմեն Բիլյանի մոտ ախտորոշվել է «Հարմարվողականության խանգարում», և նշանակվել է դեղորայքային բուժում` «Նովոպասիտ» դեղամիջոցը: Լրացուցիչ հետազոտությունների, ինչպես նաև ստացիոնար բուժման կարիք չի արձանագրվել:
Հիշեցնենք, որ վերջին դատական նիստին Արմեն Բիլյանը հայտարարել էր, որ չի դադարեցնի հացադուլը, եթե անգամ վիճակը ծայրահեղ վատանա։ Նա մեղադրվում է ՊՊԾ գնդի տարածքում ոստիկանության ավագ ենթասպա Գագիկ Մկրտչյանի սպանության մեջ, նրան մեղադրանք է առաջադրվել նաև Քրեական օրենսգրքի 238-րդ հոդվածի 4-րդ մասի 2-րդ կետով (զենք զինամթերք շորթելը, որը կատարվել է կազմակերպված խմբի կողմից, կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով) և 104 հոդվածի 2-րդ մասի 1-ին, 2-րդ, 3-րդ և 11-րդ կետերով:
