Քաղաքականություն
03.01.2018 | 13:20Խորհրդարանական համակարգից ակնկալիքները չարդարացվեցին: Factor.am-ի հետ զրույցում ամփոփելով 2017 թվականը՝ նշեց Ազգային ժողովի «Ելք» խմբակցության պատգամավոր Մանե Թանդիլյանը:
«Երբ ասում ենք պառլամենտարիզմ, ապա պետք է հասկանանք իշխանության և փոքրամասնության համատեղ աշխատանքը: Ազգային ժողովում առկա փոքրամասնությունը պետք է հավասարակշռի և զսպի իշխանություններին, սակայն մեր իշխանությունների համար պառլամենտարիզմը բառ է, որը մնում է թղթի վրա: Նրանք որևէ կերպ չեն ընկալում, որ փոքրամասնությունն ունի իր լծակները, որոնք պետք է կիրարկի խորհրդարանում»,- իր պնդումը հիմնավորեց Մանե Թանդիլյանը:
Պատգամավորի պնդմամբ՝ «Ելք» խմբակցության ինը պատգամավորներն իրենց լիազորությունների սահմաններում փորձել են տարվա ընթացքում անդրադառնալ քաղաքացիներին հուզող հարցերին:
«Պառլամենտական պետության մեջ խմբակցությունը սահմանադրական մարմին է և որպես այդպիսին պետք է ունենա լծակներ: Օրինակ՝ մենք անգամ Սահմանադրական դատարան չենք կարողանում դիմել, որպես առանձին խմբակցություն»,- ասաց Մանե Թանդիլյանը՝ հավելելով, որ խմբակցությունների լիազորություններն ավելացնելու անհրաժեշտություն կա:
Անդրադառնաով արտաքին քաղաքական ձեռքբերումներին՝ պատգամավորը, թեև չհերքեց՝ «Ելք» դաշինքի համար ողջունելի էր Եվրամիության հետ համաձայնագրի ստորագրումը, սակայն նկատեց՝ դաշինքը ասոցացման համաձայնագրի ստորագրման ջատագովն է:
«Տնտեսական այն զարգացումը, որը պետք է ապահովի պետության կայացումն ու առաջընթացը, Եվրամիության հետ ստորագրված այս փաստաթուղթը չի ապահովի: Ասոցացման համաձայնագիրն էր այն փաստաթուղթը, որը կկարողանար Հայաստանը տանել իրական զարգացման ճանապարհով»,- շեշտեց Մանե Թանդիլյանը:
Հարցազրույցն ամբողջությամբ՝ տեսանյութում:
Շողիկ Գալստյան
