Ոստիկանությունը բերման է ենթարկում ցուցարարներին. ՏԵՍԱՆՅՈՒԹ

Ազատության հրապարակում լարված իրավիճակ է ստեղծվել ոստիկանների և քիչ անց մեկնարկելիք ցույցի մասնակիցների միջև:

Իրավապահները քաղաքացիներին թույլ չեն տալիս հավաքվել հրապարակում և մեկնարկել 17 կուսակցությունների կողմից նախանշված հանրահավաքը՝ ընդդեմ Արցախի վերաբերյալ վարչպետ Նիկոլ Փաշինյանի կողմից ստորագրված որոշման:
Ոստիկանները բերման են ենթարկում Ազատության հրապարակ եկած մարդկանց:

Ոստիկանությունը հիշեցնում է, որ սեպտեմբերի 27-ից սկսած՝ ՀՀ-ում հայտարարվել է ռազմական դրություն, որի պայմաններում արգելվում են հավաքներ և հանրային միջոցառումներ կազմակերպելը, անցկացնելն ու մասնակցելը։ Ոստիկանները հորդորում ենք զերծ մնալ հավաքներ և հանրային միջոցառումներ կազմակերպելուց, անցկացնելուց և դրանց մասնակցելուց:

«Մենք չենք կարող ապրել պարտված առաջնորդի հետ, պարտված առաջնորդը պետք է հեռանա»,- ֆեյսբուքյան ուղիղ եթերում այս մասին ասաց «Լուսավոր Հայաստան» խմբակցության ղեկավար Էդմոն Մարուքյանը՝ պահանջելով ՀՀ վարչապետ Նիկոլ Փաշինյանի հրաժարականը։

«Սա այն Հայաստանը չէ, որտեղ Նիկոլ Փաշինյանը և «Իմ քայլը» 83 տոկոս ձայն են ստացել: Նիկոլ Թաշինյանի ղեկավարած Հայաստանն Արցախի հետ միասին 42 հազար քառակուսի կմ էր։ Այժմ չկա արդեն այդ Հայաստանը` նրա ստորագրած հայտարարության պատճառով։ Ուրեմն Փաշինյանն էլ չպիտի լինի այս Հայաստանի ղեկավարը։ Հայ ազգը չի կարող պարտվել, պարտվել է ղեկավարությունը, և այն` ի դեմս Նիկոլ Փաշինյանի պետք է հեռանա»,- ասել է Մարուքյանը:

Ստեփանակերտն անպաշտպան էր մնացել, եթե ռազմական գործողությունները շարունակվեին, հավանականությունը մեծ էր, որ կգրավվեր Ստեփանակերտը, Մարտունին, Ասկերանը, որից հետո մեր միչև 6-րդ պաշտպանական շրջանները կհայտնվեին շրջափակման մեջ, հազարավոր զինվորներ կհայտնվեին շրջափակման մեջ, ֆեյսբուքյան ուղիղ եթերում ասաց ՀՀ վարչապետ Նիկոլ Փաշինյան:

«Նաև տեղի կունենար ամբողջական կոլափս: Հենց այս գնահատականի հիման վրա է կայացվել այդ որոշումը: Պատահական չթվա, որ այս օրերին առաջին գծում զինվորները վիդեոուղերձներ են հղում, որտեղ իրենք պաշտպանում են կայացված որոշումը, դա նրանից է, որ նրանք տեղում տեսել են և հասկանցել են իրավիճակը, որքան էլ այն դառն է», – նշեց Փաշինյանը:

Շատ է խոսվում Շուշիի անկման, Շուշիի շուրջ դավադրությունների մասին, ֆեյսբուքյան ուղիղ եթերում ասաց ՀՀ վարչապետ Նիկոլ Փաշինյանը:

Նրա խոսքով՝ Շուշիի անկումից հետո 2 անգամ Շուշին վերադարձնելու փորձ է արվել. մեկը ամբողջությամբ ձախողվել է, մյուսի դեպքում մի ջոկատի հաջողվել է ներս մտնել Շուշի: Փաշինյանի բնորոշմամբ՝ ամբողջ հակասությունները կապվում էին դրա հետ:

«Դավադրությունների մասին խոսակցություններն արդեն քաղաքական մակարդակ են տեղափոխվում: Ինձ ասացին՝ Ծառուկյանը հայտարարել է, որ Շուշիի շուրջ դավադրություն է եղել, որ հոտեմբերի 28-ին, երբ Շուշին դեռ կանգուն էր, ՌԴ-ն պատրաստ է եղել խաղաղապահներ տեղեկայել ԼՂ-ում, բայց չեմ համաձայնել այդ ժամանակ, համաձայնել եմ այն ժամանակ, երբ Շուշին արդեն կորսված է եղել», – մանրամասնեց Փաշինյանը՝ դա անհեթեթություն որակելով:

ՀՀ վարչապետը հիշեցրեց՝ հոկտեմբերի 22-ին և 25-ին հարցազրուցներում բարձրաձայնել է, որ կողմ է ռուսական խաղաղապահների տեղակայմանը:

«Եթե դավադրության մասին ենք խոսում, եկեք նաև արձանագրենք, որ ԲՀԿ ղեկավար Գագիկ Ծառուկյանը, երբ բանտից դուրս եկավ, հայտարարեց, որ կամավորական ջոկատ է կազմելու և անձամբ է գլխավորելու: Հետո տեսանք ռեպորտաժ, վերնագրեր, որ Ծառուկյանը հանդիպել է կամավորականների հետ, տեսանք «նիվաներ», «վիլիսներ» և այլն: Բայց այդպես էլ չտեսանք կամավորական ջոկատ, առավել ևս Գագիկ Ծառուկյանի գլխավորությամբ Շուշիի մոտակայքում կռվելիս, գուցե սա է պատճառը, որ Շուշին ընկավ: Գուցե բավարար ռեզերվների դեպքում հնարավոր կլիներ Շուշին պահել: Սխալված չեմ լինի ասել, որ առանցքային պատճառներից մեկը Ծառուկյանի կամավորական ջոկատի բացակայությունն էր Շուշիի մարտին», – նշեց Փաշինյանը:

Նա նաև բարձրաձայնեց՝ գուցե, այդ ջոկատները ՀՀ-ում գործունեություն ծավալելու համար են ձևավորվել:

«Այդ փաստը պետք է ստուգվի և արժանանա քրեաիրավական գնահատականի, ինչը տեղի կունենա», – խոստացավ Փաշինյանը: