19.01.2026 | 23:38
Ռուբիոն բարձր է գնահատել Ադրբեջանի կառավարության կողմից Հայաստան վառելիքի մատակարարումները
Թուրք-ռուսական համաձայնություններ․ թուրքական զորքը դուրս է գալիս սիրիական Իդլիբ, Համա և Հալեպ նահանգներից
Քաղաքականություն
11.11.2020 | 12:57
Նոյեմբերի 10-ին մի քանի տասնյակ զրահամեքենաներ ու բեռնատարներ լքել են Սիրիայի հյուսիս-արևմուտքում՝ Իդլիբում, Համայում ու Հալեպում տեղակայված թուրքական դիրքերը։ Սիրիայի մարդու իրավունքների դիտարկման կենտրոնի (SOAH) տվյալների համաձայն՝ թուրք զինվորականներն ուղևորվել են Իդլիբ նահանգում իրենց վերահսկողության տակ մնացած մյուս դիրքերը։
Նկատվել է շուրջ 140 միավոր անվավոր տեխնիկայի տեղաշարժ Հալեպ նահանգի արևմուտքում գտնվող գյուղական վայրերում։ Բացի այդ, թուրքական ռազմական խոշոր շարասյուն է լքել ռեժիմի վերահսկողության տակ գտնվող «Մաար Հաթաթ» ռազմական հենակետն ու շարժվել դեպի Թաֆթնազ ռազմական ավիաբազա, որտեղ տեղակայված են թուրքական ուժերը:
Անցած շաբաթ թուրքական ուժերն ավարտել էին Համա նահանգի Մորեկ բնակավայրում իրենց դիտորդական կետի ապամոնտաժման աշխատանքները։
Սիրիայի մարդու իրավունքների դիտարկման կենտրոնը նշում է, որ այս հաջորդական դուրսբերումները ռուս-թուրքական պայմանավորվածությունների մաս են կազմում, որոնք նախատեսում են թուրքական ուժերի դուրսբերում վերջերս Ռուսաստանի և Սիրիայի վարչակազմերի կողմից Հալեպում, Իդլիբում և Համայում գրավված տարածքներից:
Թուրքիայի հյուսիսարևմտյան դիտակետերից թուրք զինվորների և սպաների տարհանումն ընթանում է նաև Անկարայի կողմից աջակցություն վայելող Սիրիայի զինված ընդդիմության խմբերի շարքերում շարունակվող հակամարտությունների ֆոնին:
Տաթև Ֆռանգյան
