15.12.2025 | 21:13
Ալիևը համաներում է նախաձեռնում. այն կվերաբերի ավելի քան 20,000 մարդու
«Մատ տեռորին». Լևոն Արոնյանն ու Մանուել Պետրոսյանը միաժամանակյա խաղի սեանս են անցկացրել. ԼՈՒՍԱՆԿԱՐՆԵՐ
08.11.2020 | 19:37
Գրոսմայստեր Լևոն Արոնյանն ու արցախցի գրոսմայստեր Մանուել Պետրոսյանը Հայաստանից և Արցախից ընտրված 20 երեխաների հետ միաժամանակյա խաղի սեանս են անցկացրել «Մատ տեռորին» խորագրով:
Խոսելով նախաձեռնության մասին՝ հայկական շախմատի առաջատար Լևոն Արոնյանը նշեց, որ ահաբեկչության դեմ պայքարելու համար յուրաքանչյուրը պետք է ձգտի լավագույնը լինել իր բնագավառում՝ այդպիսով «մատ անելով տեռորին»։
«Մեր դեմ կիրառվում են անմարդկային ուժեր, բայց մենք ամեն ինչով պետք է դրա դեմ պայքարենք։ Ուզում եմ՝ տեսնեք, որ ունենք հիանալի մանուկներ, որոնք շախմատ են խաղում, ունենք հրաշալի երիտասարդ երաժիշտներ։ Այս ամենը պետք է ոգևորի մեզ։ Պետք է հասկանանք, որ սա նաև մշակութային պատերազմ է, և մենք յուրաքանչյուր Անդրանիկի կողքին պետք է ունենանք Կոմիտաս, Նժդեհի կողքին՝ Տիգրան Պետրոսյան, Արամ Խաչատրյան, Մինաս Ավետիսյան։ Յուրաքանչյուրը պետք է ձգտի իր բնագավառում լինել լավագույնը։ Համոզված եմ՝ այդպես կհաղթահարենք չարը»,- ասաց Լևոն Արոնյանը։
Գրոսմայստերը նաև ընդգծեց, որ այս պատերազմում հաղթելու համար պետք չէ լռել և շատ լավ իմանալ սեփական պատմությունը։
«Թշնամին ընտրել է հակամարդկային մեթոդներ՝ ցուցաբերելով իրեն բնորոշ անմարդկային դաժանություն։ Մենք պետք է դրա դեմ պայքարենք։ Լռությունն այս պահին ամենաամոթալի բանն է։ Պետք է պայքարենք, ոգևորվենք, հիշենք մեր պատմությունը, հիշենք, որ միշտ եղել է մեր ազգի վերածնունդ, մի նոր սկիզբ։ Պետք է ավելի ուժեղ լինենք և ավելի նվիրյալ մեր ազգին»,- ասաց Արոնյանը՝ ընդգծելով, որ ունի նաև ռազմաճակատ գնալու ցանկություն և ամեն օր պատրաստ է դրան։
Շախմատային պարտիաներին զուգահեռ՝ իրականացվեց Արոնյանի մոր՝ Սեդա Արոնովայի հեղինակած «Լևոն Արոնյան» գրքի անվանական ստորագրումն ու վաճառքը, որից ստացված ամբողջ հասույթը փոխանցվելու է «Հայաստան» համահայկական հիմնադրամին։
