ՍԴ-ն ուղղակի քթի ծակ ունեցավ և ողջամտության կողքին կանգնեց. Լևոն Բարսեղյան

«Մենք դեռ մի տարի առաջ ասում էինք, որ Դավիթ Հարությունյանն ու Հրայր Թովմասյանը հորինել են դրույթներ՝ առանց որևէ հիմնավորման: Այդպես էլ չկարողացան որևէ հիմնավորում տալ, և մենք էլ հասկացանք՝ այդ մարդիկ դիտավորյալ են արել, որպեսզի լրատվամիջոցների կողմից հսկողությունն ընտրողների նկատմամբ թույլ լինի»,- անդրադառնալով ՍԴ-ի այսօր կայացրած որոշմանը՝ Factor.am -ի հետ զրույցում ասաց Գյումրու Ժուռնալիստների «Ասպարեզ» ակումբի նախագահ Լևոն Բարսեղյանը:

Նշենք, որ Սահմանադրական դատարանն այսօր ՀՀ ընտրական օրենսգրքի 31-րդ հոդվածի 8-րդ մասի 2-րդ պարբերության երկրորդ նախադասության մեջ ամրագրված «միայն մեկ զանգվածային լրատվության միջոց և այդ զանգվածային լրատվության միջոցի ոչ ավելի, քան 50 ներկայացուցիչների» դրույթը ճանաչեց ՀՀ սահմանադրության 42-րդ հոդվածի՝ կարծիքի արտահայտման ազատությունը, 51-րդ հոդվածի՝ տեղեկություններ ստանալու իրավունքը, 2-րդ մասի, 75-րդ՝ հիմնական իրավունքների և ազատությունների իրականացման կազմակերպական կառուցակարգերը և ընթացակարգերը, 78-րդ՝ համաչափության սկզբունքը, 79-րդ՝ որոշակիության սկզբունքը, 80-րդ՝ հիմնական իրավունքների և ազատությունների վերաբերյալ դրույթների էության անխախտելիությունը և 81-րդ հոդվածի՝ հիմնական իրավունքներն ու ազատությունները և միջազգային իրավական պրակտիկան, 2-րդ մասի պահանջներին հակասող և անվավեր:

Լևոն Բարսեղյանն այն կարծիքին է, որ այդ դրույթն ամրագրվել էր հատկապես «Ասպարեզ» ակումբի և «Ասպարեզ» կայքի դեմ: «Շատ լավ գիտեին, որ Սահմանադրական հանրաքվեի ժամանակ 700-ից ավել ներկայացուցիչ ենք ունեցել: Նրանց նպատակը հսկողական մեր ռեսուրսը սահմանափակելն էր: Ով գիտի, թե ընտրությունների արդյունքներն ինչպիսին կլինեին, եթե հնարավորություն ունենայի ներկայացուցիչ ուղարկել 2 000 տեղամաս: Իրենք արգելափակել են մեր իրավունքները»,- ընդգծեց նա:

Բարսեղյանը նշեց, որ սահմանափակումները պետք է լինեն ողջամիտ, անխուսափելի և բավարար, իսկ այդ սահմանափակումը նշված կետերից որևէ մեկին չէր համապատասխանում: «Երբ ես կարող եմ ներկայացուցիչներ ունենալ 2 000 տեղամասերում, բայց պետությունն ինձ ասում է 50-ից ավել մարդ չեմ կարող ունենալ, դա ողջամիտ չէ: Թող հիմնավոր լինի, թող ներկայացուցիչների թիվը 10-ը լինի, բայց հիմնավոր»,- նշեց նա:

Լևոն Բարսեղյանը, սակայն չշտապեց Սահմանադրական դատարանի այս որոշումը հաղթանակ որակել.«Երբ որ ես գիտեմ, որ ճշմարիտ եմ այդ կռիվների մեջ՝ հաղթել-չհաղթելու բան չկա: ՍԴ-ն ուղղակի քթի ծակ ունեցավ և ողջամտության կողքին կանգնեց»:

Շողիկ Գալստյան